Түркістан қаласындағы «Балалар мен жасөспірімдер спорт клубы» өз жұмысын бастағалы екі жылға жуық уақыт өтті. Клуб бастамасымен сектор тұрғындары арасында баскетбол, футбол, үлкен теннис және түрлі отбасылық, командалық ашық алаң ойындары ұйымдастырылған.
Нәтижесінде республикалық деңгейде жасөспірімдер арасында үлкен теннистен жарыс өткізіліп, оған Түркістан, Алматы, Қызылорда, Тараз, Шымкенттен келген спортшылар қатысқан.
Сонымен бірге, клубтың ұйымдастыруымен өткен Түркістан қаласының қысқы ойындары біріншілігінде 100-ге жуық тұрғын бақ сынасып, шахмат, гір тасын көтеру, волейбол, баскетбол, үстел теннисі, футбол ойындарымен қатар, ұлттық спорт түрлерінен де жарысқа түскен.
Өткен жылдың қорытындысымен клуб ұжымы республикалық, облыстық деңгейдегі бәсекелерде шаһар намысын қорғап, жүлделі орындарға ие болған. Соның ішінде, «ARMANS ZHETISAY CUP-2022» облыстық турнирінде клуб қатысушыларынан құралған команда үшінші орынды иемденсе, Кентау қаласында өткен жасөспірімдер арасындағы турнирде клубтың «Түркістан» командасы I орынды жеңіп алған болатын. Қазіргі таңда, клубта 60-қа жуық қызметкер жұмыс істейді. Оның ішінде 20 жаттықтырушы — футбол, үлкен теннис, баскетбол ойындарынан 700-ге жуық оқушыны жаттықтыруда.
Одан бөлек, мекемедегі 28 спорт нұсқаушысы қала тұрғындары арасында бұқаралық спортты дамытуда жүйелі жұмыстар атқаруда. Спорт нұсқаушылары қысқы маусымы мен жаз маусымдарында қаладағы 30-дан аса ашық алаңда таңғы жаттығулар ұйымдастырады.
Айта кетейік, клубтың үйірмелеріне қатысуға 6 жастан 17 жасқа дейінгі жасөспірімдер өтініш бере алады. Мекемедегі басқа да сауалдар бойынша мекеме директорының орынбасары Амандық Әбдікерімұлы (8 776 991 11 91) және әдіскер Фариза Әліге (8 707 222 17 10) хабарласуға болады.
