Бәйдібек аудандық сәулет-көркем музейінде жазушы, халықаралық «Алаш» әдеби сыйлығының иегері Еркінбек Тұрысовтың экспозициясы ашылды. Онда қаламгердің өмірінен сыр шертетін тарихи суреттер мен деректер, кітаптары жұртшылық назарына ұсынылған.
Жиналған көпшілік алдында музей қызметкері Э.Жамашова жазушының өмірдерегі мен шығармашылығы жөнінде баяндама жасаса, М.Әуезов атындағы мектеп оқушылары ақындардың жазушыға арнаған өлеңдерін оқыды.
Салтанатты жиында ақын Нармахан Бегалиев, жазушының жерлесі Бейсен Жарқынбаев, жазушы, «Оңтүстік Қазақстан» газетінің бөлім меңгерушісі Сабырбек Олжабай, белгілі журналист Серікбай Тұржан жазушының шығармалары, азаматтық келбеті жайында әсерлі әңгімеледі. Алдағы уақытта музейге келушілерге «Шаянның Шолоховы» атанған Еркінбек Тұрысовтың өмірі мен шығармашылығы насихатталатын болады.
Еркінбек Тұрысов — 1927 жылы 12 қазанда Бәйдібек ауданы, Талдыбұлақ ауылында туған. Шымкент педагогика институтын бітірген. Ұлы Отан соғысы жылдарында 14 жасынан еңбек ете бастады. Қатардағы колхозшы, ауылдық кеңестің хатшысы, он жылдай (1946–1955) облыстық ішкі істер басқармасында саяси қызмет атқарды. «Оңтүстік Қазақстан» газетінде әдеби қызметкер, бөлім меңгерушісі, меншікті тілші, кейінгі он жылда (1968–1978) аудандық «Алғабас» газетінің редакторы болды. 1978 жылдан шығармашылық еңбекте. Бәйдібек ауданының Құрметті азаматы. Жазушының «Келіншектау», «Ақбақай», «Қыран тауы», «Құралай жолы», «Түндер сазы» атты кітаптары жарық көрген. Ал «Темірлан» романы, «Бәйдібек», «Қош, көгілдір керуен», «Қайран Сәкен», «Кемеңгерлердің керуені», «Нұржаудың нұрлы түндері», «Алыста қалған», «Досовтың соңғы күндері» атты эссе, хикаяттардың авторы.
Бірнеше рет мемлекеттік наградалармен, екі мәрте (1977, 1987) Қазақстан Жоғарғы Кеңесінің Құрмет Грамотасымен марапатталған. «Қазақстанның еңбек сіңірген қайраткері» құрметті атағы берілген (1998). Халықаралық «Алаш» әдеби сыйлығының лауреаты (2005)
