Түлкібас ауданында волейболдан жасөспірімдер арасындағы Қазақстан Республикасының чемпионаты өз мәресіне жетті. Қаңтар айының 4-10 аралығында өткен тартысты турнирге 14 облыс пен Түлкібас ауданының құрамасы қатысқан болатын. Өңіріміздің жас волейболшылары ақтық сайыста Жетісу облысының құрамасынан есе жіберіп, нәтижесінде күміс жүлдеге қол жеткізді. АЛ бірінші орынды Жетісу өңірінің құрамасы иеленсе, үздік үштікті павлодарлық волейболшылар түйіндеді. Жеңімпаздар ҚР волейбол федерациясының кубогімен марапатталды. Сонымен қатар, жеңіс тұғырынан көрінген спортшыларға арнайы медальмен және алғыс хаттар табысталды. Айта өтсек, бүгінде Түлкібас ауданында спорт нысандарының саны артып келеді.
Еске сала өтейік, 2021 жылы Түркістан облысы, Түлкібас ауданында бұқаралық спортты дамыту мақсатында жергілікті кәсіпкерлер тарапынан 5 спорттық нысан ашылып, ел игілігіне берілген еді. Оның ішінде үшеуі кәсіпкерлік нысан ретінде ашылса, екі нысан демеушілер есебінен ауыл тұрғындарына тарту етілген болатын. Атап айтсақ, Т.Рысқұлов ауылынан «Байқадам» футбол манежі, «Нур-Фари» фитнес клубы мен күрес залы, Балықты ауылындағы «Форсе фит» фитнес клубы кәсіпкерлік нысан ретінде ашылып, тұрғындардың сүйікті орындарына айналып үлгерді. Сонымен бірге, жомарт жанды азаматтар тарапынан Қожамберді және Шақпақ-баба ауылдарында жасанды кіші футбол алаңы ашылып, ауыл тұрғындарына тарту етілген-ді. Одан бөлек, М.Жәрімбетов ауылында жеке кәсіпкер есебінен футбол манежі, жүзу бассейні және жаттығу залының құрылысы жүріп жатыр.
Бұл жұмыстар 2022 жылыда жалғасын тапты. Саладағы игі істер нәтижесінде ауданда тұрақты түрде спортпен шұғылданушылар саны қырық пайызға жуықтаған. 2023 жылы бұл көрсеткіш артады деген жоспарда бар.
