Әлем чемпионатының жеңімпазы мен жүлдегері атанып, туған елге жүлдемен оралды. Қазақ күресінен өткен Әлем чемпионатында түркістандық балуандар топ жарды. Астана қаласында қазақ күресінен ересектер мен жастар, жасөспірімдер арасында өткен кезекті әлемдік деңгейдегі дода өз мәресіне жетті. Дүниежүзінің әр түкпірінен келген ең талантты балуандар бақ сынасқан белдесуде Қазақстанның мерейін үстем еткен Түркістан облысының дарынды саңлақтары топ жарып отыр.
Боз кілемде барлық күш-жігерін көрсеткен жерлестеріміз Әлем чемпионатының жеңімпазы мен жүлдегері атанып, туған елге жүлдемен оралды. Әлем бойынша ең танымал спортшылар жиналған күрес додасында ересектер арасында өнер көрсеткен 90 келі салмақтағы түркістандық Айдарбек Тоқтарбек қола жүлдені иеленген. Ал жүлделі алтын медальді +82 келідегі Түркістандық спортшы Сардар Абдисамитұлы иеленіп, сайыста жеңімпаз атанды. Қазақ халқымыздың төл өнері қазақ күресімен жастайынан кәсіби тұрғыда айналысып келе жатқан Сардар Әлем чемпионатында барлық қарсыластарын тізе бүктіріп, жеңіске жетті. Сонымен қатар, талай күрес мамандарының назарын өз талантымен таң қалдырып 72 келіде сынға түскен жас балуан Балтабай Ералхан да қола жүлдеге ие болды.
Бұдан бөлек, жасөспірімдер арасында 60 келіде белдескен болашағы жарқын Розман Тугушов пен дарындылығының арқасында мол тәжірибе жинауды мақсат еткен 82 келідегі Темірхан Дауірсейітханға қола жүлде бұйырды. Әрбір саңлақтың жеңіске жету жолында ең алдымен бапкерлердің ерен еңбегі орасан.
Түркістан облысында қазақ күресінің дамуына мол үлес қосып, талантты балуандарды тәрбиелеп келе жатқан білікті жаттықтырушылар қатарындағы – Қайрат Пазылбек, Ерлан Сыздықов, Айдос Сералиев, Мырза Хидировтар та бар. Олар өңіріміздегі күрес майталмандары болып саналады.
