Австрияның Грацта қаласында 26-27 қараша күндері эстетикалық топтық гимнастикадан Әлем чемпионаты өтті. Оған Қазақстан құрамасы сапында шымкенттік «Кармелиты» командасы қатысты.
Команданың құрамында Элина Кан, Саида Патшахан, Аида Жақсыбек, Сәния Тұрдыбай, Сабина Елубаева сынды спортшылар болды. Олар- Әлия Юсупова басқаратын Шымкент қалалық №9 көркем гимнастика спорт мектебінің шәкірттері. Любовь Боброва, Виолетта Керхер сынды білікті мамандар даярлаған гимнастшылар бәсекелі жарыста 3-ші орынды иеленді.
«Мен Әлем чемпионатында эстетикалық топтық гимнастикадан Қазақстан Республикасының Ұлттық құрама командасының өнер көрсеткеніне қуаныштымын. Спортшыларымыз Қазақстанды халықаралық аренада абыроймен таныстырып, жүктелген барлық міндеттерді орындады. Әр команданың өзіндік сипаты, стилі және сөйлеу мәнері бар, бұл гимнастшыларға бейнелер жасауға және ойластырылған идеяны жүзеге асыруға мүмкіндік береді. Жаттықтырушылар мен хореографтардың ынта-жігерге, адалдыққа, балаларға және спортқа деген сүйіспеншілікке негізделген кәсіби жұмысын атап өткен жөн. Спортшылардың ата — аналарына балаларға деген сенімі мен қолдауы үшін үлкен алғыс айтамын», — деді эстетикалық гимнастикадан ҚР бас жаттықтырушысы Венера Жайлауова.
ҚР эстетикалық гимнастика федерациясы 2017 жылдан бастап елімізде жеке спорт түрі ретінде дамыды. ҚР Ұлттық Олимпиада комитеті құрамына еніп, Қазақстан Республикасының Мәдениет және спорт министрлігінде ресми тіркелген. Қазақстан Халықаралық эстетикалық гимнастика федерациясының (IFAGG) құрамына кіреді. Федерация спортшылары 2018 жылдан бастап халықаралық барлық ресми жарыстарға қатысып, табысты өнер көрсетуде.
Айта кетейік, эстетикалық гинастикадан ел құрамасы биыл Малайзияның астанасы Куала-Лумпур қаласында өткен Азия чемпионатында 11 медаль еншілеген болатын.
