Түркістан облысы полицейлері азаматтарға ұрылардан сақ болу үшін осындай ескерту жасады. Себебі Арыс АПБ-не арызданған жергілікті тұрғын, 6 бас қойым ұрланды деп отыр. Түнгі уақытта белгісіз тұлғалар тұрғын-үйінің ауласына заңсыз кіріп төрт түлігін айдап кеткен. Жәбірленушіге келтірілген шығын көлемі 400 000-нан астам теңгені құрады. Осындай арызбен полиция бөліміне тағы бір тұрғын хабарлама түсірді. Жәбірленуші әйелдің айтуынша, оның ауласындағы қорасынан 2 бас қойын ұрылар жасырын жымқырып кеткен. Аталған жайттар СДТТБТ-не енгізіліп, ҚР ҚК-нің 188-1-бабымен тіркелді.
Шұғыл әрекет жасаған полицейлер күдіктінің бірін Нұр-Сұлтан қаласында жасырынып, жұмыс істеп жүрген жерінен анықтап, ұстады. Күдікті аудандық полиция бөліміне жеткізілді. Ол өз кінәсін толық мойындап, қасындағы сыбайласы екеуі ұрлаған қойларды сатып жіберіп, ақшасын бөліп алғандарын жеткізді. Қазіргі таңда күдікті қамауға алынды. Ал, сыбайласын ұстау бойынша тәртіп сақшылары жедел-іздестіру жұмыстарын жүргізуде. Аталған жайттар бойынша сотқа дейінгі тергеу амалдары жүргізілуде.
