Түркістан музыкалық драма театрында «Мағжан» спектаклінің премьерасы көрерменге жол тартпақ. Туынды 12-13 қарашада жас драматург Алмас Нүсіптің пьесасына қойылады. Қойылымда алаш қозғалысының қайраткері, ұлы ақын Мағжан Жұмабаевтың шығармашылығынан бөлек, ашаршылық кезіндегі депрессиясы мен ішкі өзгерісі бейнеленеді. Алаш ардақтысының рөлін сомдауға ҚР Еңбек сіңірген қайраткері, актер Еркебұлан Дайыров таңдалған.
Мағжан Жұмабаев – алаш қозғалысының қайраткері, ұлы ақын, ғалым, аудармашы. Ол ағартушылық, ұлт-азаттық, демократияшыл бағытты ұстанған тұлға. Мағжан өлеңдерін әлеуметтік мәселелерді көтеруге, халқын өнер-білімге шақыруға, махаббат тақырыбына арнады Өз поэзиясының алғашқы қадамдарынан бастап ақтық демі біткенге дейін Мағжан Жұмабаев ұлт азаттық тақырыбын үзбей толғады, оны өз поэзиясының өзегі етті. Түркі халықтарының бірлігі – Мағжан поэзиясының әуелден қалыптасқан алтын арқауы болды.
Ағартушылық саласындағы өмірі, махаббаты, ұлтқа адал қызметі, қазақ даласын жайлаған аштық (1921-1922 жылдар) «Мағжан» спектаклінің тақырыбы. Көрермен спектакльден жас Мағжанның, өмірге ғашық Мағжанның, елінің ауыр халі үшін шексіз азап шеккен, басын қатерге тіккен Мағжанның және бірнеше мәрте геноцидке ұшыраған қазақ халқының ауыр тағдырын көрді.
«Мағжан» спектаклі идеясының авторы және көркемдік жетекшісі — Айнұр Көпбасарова, қоюшы режиссері-Davide Livermore (Италия) режиссер — Chiara Ocella, сценограф — Eleonora Peronetti, координатор-Deidda Petra композиторы-Хамит Шанғалиев, балетмейстері – Мадина Муратпекова, грим бойынша суретші – Адэль Нұрқасымова.
Қойылымда Алаштың арысы, ақиқаттың алдаспанына айналған қазақ халқының мақтанышы, ел болашағының тұтқасы жалынды жастарға зор сенім артқан дарынды ақын Мағжан Жұмабаевтың жастық шағынан бастап өмірінің соңғы кезеңіне дейінгі өмір жолы, абақтыдағы азапты ғұмыры мен жұбайы Зылихаға деген адал махаббаты суреттеледі.
Ақынның өмірі, елдің тағдыры, ұлт зиялыларының бастан кешкендері мен бір-біріне деген қолдауы, ер мен әйел арасындағы адал махаббат баян етілген қойылым «Әлдиле, өлім, әлдиле» деген жарының өлеңін соңғы рет қайталай отырып, шындық пен сағынышты көкірегінде қаттаған Зылиха ананың өлім құшағына енуімен аяқталады.
ЕРКЕБҰЛАН ДАЙЫРОВ – АКТЕР — Қазір дамыған заманда кез келген жерден, интернеттен мағжан туралы көптеген мәлімет алуға болады. Дегенмен қазір бізде елдос тоқтарбай деген алаштанушы бауырымыз бар. менің осы рольді сомдауыма сол жігіттің шығармалары мен туындылары көп көмектесіп жатыр.
