Түркістан облыстық клиникалық ауруханасында Ұлыбритания мен Ресейден белгілі ғалым-профессорлар Холден Генри, оның шәкірті Рауан Кайыржанов, нейрогенетик Сергей Курбатовтың қатысуымен мастер-класс өткізілді. Дәрігерлер диагнозы қиын науқастармен кездесіп, әр клиникалық жағдайды жеке қарастырды. Жалпы 50-ге жуық науқас қаралды. Пациенттер қозғалыс бұзылыстары, нейробұлшықет патологиясы диагноздарымен келді.
Айткүл Ахметова Түркістан облыстық клиникалық ауруханасына шетелдік мамамандардың келетінін естіп, қабылдауға алғашқылардың бірі болып жазылған. Айтуынша, ауыр дертке шалдыққан немересін Ұлыбритания және Ресейден келген профессор мамандар тексеріп, арнайы талдаулар да жасаған. Енді бұл талдамалар Лондон қаласындағы зертханаға жолданады.Айткүл Ахметованың сөзінше осыған дейін олар Мәскеу, Алматы, Астана, Оңтүстік Кореядада тексеруден өтіп, дерттің нақты диагнозын анықтай алмаған. Тіпті ақ халаттылар осы күнге дейін бұл аурудың емделмейтінін де айтқан көрінеді.
Түркістан облыстық клиникалық ауруханасына тәжірибе алмасу мақсатында келген шетелдік профессорлар алдын ала жазылған 50-ге жуық науқасты тексеруден өткізеді. Олардың барлығында жүйке бұлшықетінің потологиясы бар. Яғни неврологиялық дерттің ауыр түріне шалдыққандар арнайы диагностикадан өтеді. Алдағы уақытта жергілікті дәрігерлер шетелдік мамандармен байланысты үзбейді. Сөйтіп, науқасқа бірлесіп диагноз қойып, емдеудің заманауи әдістерін ұсынатын болады. Шара аясында шетелдік мамандармен тәжірибе алмасу мақсатында шеберлік сабақтар да ұйымдастырылмақшы. Бұл шара екі күнге созылады деп күтілуде.
Айта кетейік, 10-11 қарашада Шымкентте «Клиникалық неврология және психиатрияның өзекті мәселелері» тақырыбында халықаралық конференция өтеді. Алдымен жақын және алыс шетелдерден келген спикерлердің қатысуымен конференцияның пленарлық және секциялық отырыстары ұйымдастырылады Бағдарлама балалар мен ересектер неврологиясы мен жүйке жүйесінің ауруларын диагностикалау, емдеу және оңалту мәселелерін қамтитын болады.
