Созақ ауданы, Таукент кентінде төрт бірдей балалар ойын алаңшасы ашылды. Сондай-ақ «Атомшылар алеясы» мен «Street workout» алаңы ел игілігіне берілді. Игі бастама уран экспортымен айналысатын компанияның халыққа жасаған алғашқы жақсылығы емес. Бұған дейін Созақта бірнеше әлеуметтік нысан мен спорттық алаңша дәл осы серіктістік арқасында бой көтерген. Компания басшылығы келесі жылы тағы да ел игілігі үшін бірнеше жоба әзірлеп жатырмыз дейді.
Бүгінде Созақ ауданы, Таукент кентінде «Kazatomprom-SaUran» жауапкершілігі шектеулі серіктестігінің қолдауымен салынған төрт балалар ойын алаңшасы, «Атомшылар алеясы» және «Street workout» алаңының ашылу салтанаты өтті.
Жиында аудан басшысы Мұхит Тұрысбеков тұрғындарды нысандардың ашылуымен және «Kazatomprom-SaUran» ЖШС-нің құрылғанына 25 жыл толу мерекесімен құттықтап, компанияның бас директоры Асқар Нұрғалиевке аудан әкімінің алғыс хаты мен сый-сияпатын табыс етті.
— Мемлекет басшысы Қасым-Жомарт Тоқаевтың Жолдауында айтылғандай, халыққа көмек көресетуді жүзеге асырып, көптің ықыласына бөленіп келген «Kazatomprom-SaUran» компаниясы ауданның даму жолында әрқашан үлкен қолдау білдіріп келеді. Осындай өрелі өндіріс орындары өңірімізде өркен жайып, әлеуметтік көмекті қажет ететін отбасыларға және бірқатар әлеуметтік нысандарға демеушілік көрсетіп жүр. Бүгін, міне, Таукент кентінде төрт балалар ойын алаңшасы, «Атомшылар аллеясының» және «Street workout» алаңының ашылуына куә болып отырмыз. Осынау әлеуметтік қолдауға Созақ ауданы тұрғындары атынан ризашылығымды білдіремін, — деді Мұхит Тұрысбеков.
Аталған жиында Таукент кентінің ардагерлер кеңесінің төрағасы Төленбек Әйнекбаев аудан басшысы мен демеуші компания ұжымына кент тұрғындары атынын алғысын білдірді.
«Kazatomprom-SaUran» ЖШС-нің бас директоры Асқар Нұрғалиев аудан көлемінде осындай игі шаралар өз жалғасын табатынын жеткізді.
