Түлкібастық бағбандар алма жинаудан рекордтық көрсеткішке қол жеткізбек. Қазірдің өзінде мұнда аудан шаруалары 3 мың гектардан астам аумақтан 35 мың тоннаға жуық өнім жинаған. Алмалар аудан нарығынан бөлек, Алматы, Астана қалаларына жөнелтілуде. Тіпті Ресей мемлекетіне де экспортталып жатыр.
Жалпы ауданда 3062 гектар алма бауы бар. Мұнда алма егуге қызығушылық білдіріп жатқан шаруалар саны басым. Солардың бірі «Кентау» шаруа қожалығы. Бүгінде қожалық иелігіндегі бау көлемі 210 гектарға жеткен. Оның басым көпшілігі италиялық құрал – жабдықтармен жарақтандырылған. Отырғызылған көшеттер 3 жылдан соң гектарына 60 тоннаға жуық өнім беруге қауқарлы.
ҚАЙРАТ САДЫҚОВ — «КЕНТАУ» ЖШС ДИРЕКТОРЫ — Біздің компания 2011 жылы бірінші бауды еккен болатын. 27 гектар жоғары жақтан. Бүгінгі күні біздің бауымыз 210 гектар. Бұл жерде біз көшеттерді шетелден әкелдік. Польша, Турция, Итальядан әкелгенбіз. Қазір әлі терім біткен жоқ. Бүгінгі таңда 5400 тоннаға шейін өнім алып үлгердік. Терім әлі болып жатыр. Мына жерде 68 гектарымыз бар. 2017-2018 жылы отырғызылған баулар. Соның 1 гектарынан 54 тонна жинадық.
Бүгінде түлкібастық алмалар елімізден өзге, Ресей, Беларусь елдеріне де экспортталуда. Тапсырыс берушілер тарапынан дәмділіген бөлек, ұзақ сақталуына да мән беріледі. Мәселен, бұл серіктестіктің өзінде 20-ға жуық алма түрі өсіріледі. Қазіргі таңда компания алмаларды сорттап, сауда желісіне жөнелтуде.
ГҮЛНӘЗИРА БЕКБОЛАТОВА — ЖҰМЫСШЫ — Жалқау дегенді білмеймін. Жұмыс іздеген адам табады жұмысты. Ауылды жерде де жұмыс көп. Қысы жазы осы жерде жұмыс істейміз біз. Аппаратпен жұмыс істейміз, сараптауда тұрмыз ғой. Сараптау біткеннен кейін біз далаға шығамыз. Қырқуға. Қысы жазы тоқтамай, Айлығымыз жақсы. Мен де төрт балашаға бар. Ешкімнен кем қылмай асырап жатырмыз, жақсы төлейді.
Түлкібас ауданында бүгінде бау егумен ірілі-ұсақты 50 ге жуық шаруа қожалығы айналысады. Ірі қожалықтар саны 10 ға жуықтаған. Мұндағы бір серіктестіктің иелігінде 400 гектарға жуық бау бар.
ЖӘНІБЕК КЕРІМҚҰЛОВ — ТҮРКІСТАН ОБЛЫСЫ ТҮЛКІБАС АУДАНЫ АУЫЛ ШАРУАШЫЛЫҚ ЖӘНЕ ЖЕР ҚАТЫНАСТАРЫ БӨЛІМІНІҢ БАСШЫСЫ: Биыл ауа-райы жақсы болып, алмамыз жақсы өнім бере бастады. Қойма толды. Облыстармен шет мемлекеттерге жөнелтіліп жатыр. Алма егумен 10-нан көп қожалық айналысуда. Оның ішінде үлкен-үлкен қожалықтарымыз бар. «Кентал», «Кентау», «Мөлдір», ЖолТранс сервис деген ЖШС-лар алма баулармен айналысады.
Тәтті алмасымен танымал Түлкібас өңіріндегі шаруалар биыл көл-көсір пайдаға кенелуде. Ауыл шаруашылық саласындағы жетістіктері де аз емес. Әсіресе, алма өсіруде бұл аймаққа тең келер мекен жоқ. Биылдың өзінде бағбандар 140 гектардан астам жерге алма көшеттерін отырғызған.
