Қуанышты шараға Интергаз Орталық Азия АҚ-ның Түркістан газ шаруашылығының басшысы Ақиқат Абдуллаев, Түркістан облыстық Энергетика және тұрғын үй-коммуналдық шаруашылық басқармасы басшысының орынбасары Роза Олжабайқызы, аудан әкімі Ғани Рысбеков және ауыл ақсақалдары, тұрғындар қатысты.
Табиғи газ беру жұмыстары Шаға ауылдық округіне қарасты Қазақстанның 30-жылдығы елдімекенінен басталды. Қалған елдімекендерге табиғи газ беру жұмыстары ретімен жалғасады. Шаға және Жаңа Иқан ауылдық округтеріне табиғи газ №16 Ескі Иқан автоматтандырылған газ тарату станциясы арқылы беріледі. Аудан әкімдігі мен «ҚазТрансГаз» АҚ елді мекендерге газ беру жұмыстарын жүргізуде.
Еске сала кетсек, осыған дейін Түркістан облысы, Ордабасы ауданы, Бөржар ауылдық округіне қарасты 600-ден астам тұрғыны бар Теспе және 1000-нан астам тұрғыны бар Ықыластемір ауылдарына табиғи газ берілген еді. Қос ауылдың көптен күткен қуанышына ортақтасуға Ордабасы ауданының әкімі Нұрбек Бадырақов арнайы қатысып, тұрғындарды құттықтаған-ды.
Теспе ауылына газ тарту жұмысын «Texprom» ЖШС мердігер мекемесі жүргізген. Тиісті жұмыстарға қаралған қаржының көлемі – 150 млн 726 мың теңге. Абонент саны – 104. Газ құбырының жалпы ұзындығы – 13,7 шақырым.
Ықыластемір ауылына газ тарту жұмысын «Нұрай құрылыс жолы» ЖШС мердігер мекемесі жүргізген. Тиісті жұмыстарға 54 млн. 887 млн. теңге қаралған. Абонент саны – 169. Газ құбырының жалпы ұзындығы – 6,9 шақырым.
Түркістан облысы, Ордабасы ауданында 9 елді мекен газбен қамтылған. 2022 жылдың қорытындысымен 24 574 жеке тұрғын табиғи газға қол жеткізіп, көрсеткіш 19,6%-ға жетеді.
Жалпы, биыл Ордабасы ауданы бойынша 24 елді мекенде 28 газ нысанының құрылысы жүргізілуде. Барлығы 2023 жылға өтпелі. Келесі жылы 24 елді мекенде газ нысандары іске қосылған жағдайда барлығы 69 952 тұрғын (57,3%) табиғи газға қол жеткізбек.
