Бұл туралы өңірлік коммуникациялар қызметі алаңында өткен брифингте Түркістан облысының Мемлекеттік сәулет-құрылыс бақылауы басқармасы басшысының орынбасары Тарту Орынтайұлы мәлім етті.
Спикердің айтуынша, өңірдегі заңсыз құрылыстар тұрақты бақылауға алынып, тиісті шаралар қабылданған. Жыл басынан бері Түркістан облысы аумағында заң талаптарын сақтамай салынған 142 құрылыс нысаны анықталды. Жалпы 38,97 млн теңге айыппұлдың бүгінгі күнге 95,94 пайызы өндіріліп, 37,39 млн теңге облыстық бюджетке кіріске алынған.
— Басқарма тарапынан құрылыс нысандарында тиісті ережелер мен нормаларды сақтау және құрылыстың сапасын жақсарту ерекше назарда тұр. Биыл жыл басынан бері басқармаға жеке тұлғалардан — 203 және заңды тұлғалардан — 80 өтініш пен арыз-шағым қаралды. Қазақстан Республикасының Азаматтық Кодексінің 244-бабына сәйкес, басқарма тарапынан заңсыз, өз бетінше салынған құрылыстарды мәжбүрлеп бұздыру туралы 9 талап арыз сотқа жолданып, 4 қанағаттандырылды, 5 қаралуда. 2022 жылғы қаңтар-қыркүйек айлары аралығында 560 нысанның құрылыс-монтаж жұмыстарын басталуы жөнінде хабарламалар тіркелген. Бұл ретте, 189 нысанның құрылысы бюджет қаражаты есебінен, 371 нысанның құрылысы жеке кәсіпкерлік қаражаты есебінен салынуда, — деді басқармасы басшысының орынбасары.
Т. Орынтайұлының мәлімдеуінше, 2022 жылғы қаңтар-қыркүйек айлары аралығындағы жұмыс қорытындысы бойынша құрылыс саласында лицензия алуға, қайта тіркеуге, аттестат алуға қатысты барлығы 819 өтініш қабылданған. Оның ішінде лицензия бойынша 364 өтініш тіркеліп, 314 өтініш қанағаттандырылған. Өтініштердің мерзімдері өтіп қаралған жағдай орын алмаған.
Айта кетейік, басқарма тарапынан көрсетілетін мемлекеттік қызметтер 100% электронды түрде жүргізіледі. Қазіргі таңда құрылыс нысандарына бақылау және қадағалау жұмыстары тұрақты.
