Ардагер – құрметті, ардақты, қадірлі адам деген мағынаны білдіретін этикалық ұғым. Ел қамын ойлап, намысын қорғаған, елеулі еңбек сіңірген, қоғамда ерекше істерімен, ақыл-парасатымен, адамгершілік асыл қасиетімен, беделімен жұртшылыққа танылған жетісайлық ардагерлер «25 қазан – Республика күні» ұлттық мерекесі мен Республикалық ардагерлер қоғамдық бірлестігінің 35 жылдығының, аудандық әжелер алқасының төрайымы Айжамал Қоңырбаеваның 80 жасқа толу мерейтойы аясында аудандық ардагерлер кеңесінің ұйымдастыруымен өткен байрақты бәсекеде кездесті.
Аталмыш турнирге Абай ауылдық округі ардагерлерінің «Гүлдер», Қызылқұм ауылдық округі ардагерлерінің «Жігер», аудандық ардагерлер кеңесінен «Ардагер» және болашақ ардагерлерден құралған «Аманат» сынды 4 команда қатысып, өз бақтарын сынасты.
«Бұл жарыстың басты мақсаты – ардагерлерімізге мерекелік көңіл-күй сыйлап, бір-бірімен дидарластыру, бос уақыттарында аз да болса спортпен шұғылдануларына жағдай жасау болды. Біздің бастамамызды қолдап, демеушілік жасаған ұйымдастыру алқаларына айтар алғысымыз шексіз. Алдағы уақыттарда да мұндай шараларды ұйымдастыра беру жоспарымызда бар. Бүгінгі мерекелік жарыста жеңіске жеткендер мен белсене қатысқан ардагерлеріміз бағалы сыйлықтармен, арнайы дипломдармен марапатталатын болады» дейді аудандық ардагерлер кеңесі төрағасының орынбасары Жахангир Айнабеков.
Өзара тартысты өткен жарыс қорытындысы бойынша ІІІ орынға «Жігер» командасы табан тіресе, ІІ орынды «Гүлдер» командасы, І орынды болашақ ардагерлерден құралған «Аманат» командасы қанжығасына байлады. Ал, бас жүлдені еншілеген аудандық ардагерлер кеңесінің «Ардагер» құрамасы турнирдің жеңімпазы атанды.
Барлық жеңімпаз командалар мен үздік ойын көрсеткен жекелеген ойыншылар ұйымдастырушылардың бағалы сыйлықтарымен, арнайы дипломдарымен марапатталды.
