Бүгін Жетісай ауданындағы Рәміздер аллеясында «25 қазан – Республика күні» ұлттық мереке аясында салтанатты іс-шара болып өтті.
Шараға аудандық ішкі саясат бөлімінің бас маманы Ақжарқын Егембердіқызы Нөкерәулеті мен аудандық «Жастар ресурстық орталығы» КММ басшысы Нұрлыбек Сағынбекұлы Мутаев бастаған белсенді жастар, аудандық адами әлеуетті дамыту бөлімінің әдіскері Бауыржан Кеттебеков пен аудандық Жетісай Аудандық Мәдениет Үйінің директоры Перизат Тәжібаева, мектеп оқушылары мен аудан өнерпаздары қатысты. Шара барысында қатысушыларға «Республика күні» мерекесінің мән-маңызы түсіндіріліп, қол жеткізген жетістіктер дәріптелді.
«Тарих парақтарымен салмақтағанда қас-қағым сәт болғанымен жеткен жетістіктеріміз ғасырға татырлық. Әлемдік ареналар мен спорттық олимпиадаларда көк байрағымыз желбіреп, Әнұранымыз шырқалуда. Бұл Тәуелсіз жас мемлекет үшін үлкен мақтаныш. Елдігімізді айшықтайтын Республика күнін өскелең ұрпаққа ұлықтау мақсатында осы іс-шараны ауданның белсенді жастарымен бірге ұйымдастырып отырмыз» деген Ақжарқын Егембердіқызы көпшілікті ұлттық мерекемен құттықтады.
Өскелең ұрпақты отандық патриотизм мен жоғары азаматтық сабақтастыққа үндеп, қоғамның рухани бірлігін нығайту мақсатында ұйымдастырылған мерекелік іс-шара соңында жетісайлық жастар қаланың көрікті көшелерінде автошеру өткізіп, мерекенің маңызын айшықтай түсті.
Айта кетсек, Тәуелсіздік алғалы 25 қазан Республика күні ретінде тойланып келді. Алайда бұл күн мемлекеттік мерекелер тізімінен 2009 жылы алынып тасталды.Айта кетейік, 1990 жылдың 25 қазаны күні Қазақ КСР Жоғарғы Кеңесінің шешімімен «Қаз ССР-нің мемлекеттік егемендігі туралы» декларация қабылданды. Сол сәттен бастап егеменді Қазақстан еңсесі биік, терезесі тең жеке мемлекет ретінде таныла бастады. Қабылданған декларация Қазақстанның болашақ тәуелсіздігінің іргетасы саналды.
Бұл декларацияның қабылдануымен егемендігін мәлім ететін жеке территориясы, азаматтығы, мемлекеттік бюджеті, халықаралық қатынастардағы дербестігі, мемлекеттік рәміздеріміз бекітілді.
