Түлкібас ауданындағы Майлыкент ауылдық округіне қарасты «Күншуақ» мөлтек ауданында заманауи ойын алаңшасы қолданысқа берілді. Бұл жаңа алаңша асыр сала ойнаған балдырғандардың тілегі. «Балалар жылы» аясында ашылған алаңша олардың бос уақытын тиімді өткізуге және спортты дамытуға зор мүмкіндік береді.
Мұнда балалардың қауіпсіздігі үшін ойын алаңшаларының едендеріне резеңке жабынды төселген. Орындықтар мен қоқыс құтылары да орнатылған.
Айта кетерлігі, Түлкібас аудан әкімі Нұрлан Байғұттың округ тұрғындары алдындағы есептік кездесуінде көтерілген бұл мәселе көп ұзамай шешімін тапты. Ауыл тұрғындары игі шараға қолдау көрсеткен жандарға алғыс айтып, өз ризашылықтарын жеткізді.
Тағы бір ақпар. Қазақстан Республикасының Президенті Қасым-Жомарт Тоқаевтың «Халық үніне құлақ асатын мемлекет» тұжырымдасының аясында «Халық қатысатын бюджет» жобасы іске асыру мақсатында кез-келген қала тұрғыны қала аумағын абаттандыру, дамыту және жақсарту бойынша өз идеясын ұсына алады. Өңірде бұл жоба өз нәтижесін беріп жатыр. Жоба аясында тұрғындардың өңірді абаттандыруда жергілікті бюджет қаражатын бөлуге қатысуға мүмкіндігі бар. Осы орайда аумақты көгалдандыру, тротуарларды, пандустарды, арықтарды салу және жөндеу, ортақ пайдалану орындарын құру, жөндеу және жарықтандыру, бордюрларды, қоқыс тастайтын жерлерді жою, ортақ пайдалану орындарында күркелер, орындықтар, урналар және балалардың ойнауы және ересек тұрғындардың демалуы үшін жабдықтар мен конструкциялар орнату, балалар ойын алаңдарын орнату, жөндеу және жарықтандыру ескерілген.
Түлкібас ауданында ашылған бұл балалар алаңшасы соңғысы емес. Алдағы уақытта аудандағы өзге ауыл бүлдіршіндері де қуанышқа кенеледі.
