Шымкентте 402 мың тұрғынның бұқаралық спортпен айналысуы үшін мыңға жуық спорт нысаны бар. Ал, 34 спорттық ұйымда кәсіби спортшылар жаттығады. Бұл мекемелерде спорттың 71 түрі бойынша 925 жаттықтырушы жұмыс істейді. Айта кетейік, оның 9-ы ұлттық спорт түріне жатады. Бұл туралы дене шынықтыру және спорт басқармасы 9 айда атқарған жұмысының есебінде жарияланды. Басқарма басшысының айтуынша, қала спортшылары биыл Қазақстан чемпионаттарында мың жарымдай медаль жеңіп алған. Оның 491-і бас жүлде, алтын медаль. Сондай-ақ әлемдек деңгейдегі жарыстарда, яғни Азия, Әлем чемпионаттарында да шымкенттік спортшылар топ жарып жүр.
Дене шынықтыру және спорт басқармасының басшысы сонымен бірге 24-і сурдлимпиада ойындарында екі спортшы үздік нәтиже көрсеткенін айтты. 1-15 мамыр аралығында Бразилияда өткен додада шымкенттік еркін күрес шебері Рсалы Сабыржан 2 орын, Пернеш Шадияр 5 орын иеленген.
Сала басшысы биыл қаладағы спорт нысандарында жүргізіліп жатқан құрылыс жұмыстарына да тоқталды. Биыл бюджет есебінен 3, жеке инвесторлар арқылы 4 спорт нысанының құрылысы жүріп жатыр. Атап айтсақ, «Металлург» стадионы реконструкцияланса, Бозарықта жаңа спорт мектебі, Сайрамда спорт мектебіне қосымша ғимарт салынып жатыр. Спорт лайф футбол орталығы мен Тұран спорт нысанының құрылысы толық аяқталды, ал жаңа Ипподром жыл соңына дейін пайдалануға беріледі. Биыл Үстел теннисі орталығының құрылысы да басталады.Сондай-ақ 2022 жылдың 9 айында Шымкент шаһарында 29 Қазақстан чемпионаты және 9 республикалық жарыс өтті. Аталған іс-шараларға Қазақстанның барлық өңірінен 13 800-ге жуық спортшы мен жаттықтырушы қатысқан. Ал Tartyl fest, Брусья FEST фестивалдері мен «Shymkent Marathon» бұқаралық-спорттық іс-шарасы жалпы 8 мың адамды қамтыды. Жалпы биыл Ұлттық құрама сапына Шымкенттен ересектер бойынша 416, жастар құрамасына 268, жасөспірімдер құрамасына 201 спортшы енген.
