Мемлекет басшысы Қасым-Жомарт Тоқаевтың тапсырмасына сәйкес елімізде спортты дамытуға, спорттық инфрақұрылымның балаларға барынша қолжетімділігін қамтамасыз етуге көңіл бөлінуде. Осы бағытта Сарыағаш ауданы, Дарбаза ауылдық округінде заманауи спорт алаңшасы бой көтерді. Аталған спорт алаңшасына аудан әкімі Мұхит Отаршиев арнайы барып, ашылу салтанатына қатысты.
– Бұл – мемлекетіміздің ел келешегін, ұрпақ болашағын қамдастырып отырған салиқалы саясатының жарқын көрінісі. Тәуелсіз Отанымыздың тұғырлы, ғұмырлы болуы – бүгінгі жас ұрпақтың қолында. Бүгінгі пайдалануға беріліп отырған алаңша спортты сүйетін қалың жұртшылықтың, әсіресе, жастардың қымбатты ордасына айналсын! Келешекте республикамыздың намысын қорғайтын Азия, Әлем, Олимпиада чемпиондары шықсын! – деді аудан басшысы.
Айта кетсек, аталған спорт алаңшасы аудандық бюджет есебінен салынды. Жалпы ауданы 0,30 гектарды құрайтын спорт алаңшасында футбол алаңы, автотұрақ, сонымен қатар Workout-пен (жаттығу алаңшасымен) жабдықталған. Мұнда жақын маңда тұратын балалар волейбол, футболдан сайысып, қосымша спорт түрлерімен де айналысатын болады.
Қосымша ақпар. Бұқаралық спортты дамыту мақсатында 2021 жылы облыс аумағында 1536 бұқаралық спорттық іс-шаралар өткізіліп, оған 173 539 адам қатысты, оның ішінде ауылды жерлерде 1161 спорттық іс-шаралар өткізіліп, оған 133 441 адам қамтылған. 2021 жылдың қорытындысы бойынша облыста дене шынықтыру және спортпен тұрақты түрде шұғылданушылар саны 718 004 адамды құрап, облыстағы барлық жастағы халықтың спортпен қамтылуы 34,59 %. Облыс көлемінде 59 (30 олимпиадалық, 29 олимпиадалық емес) спорт түрлері дамытылуда. 2021 жылы облыс спортшылары спорттың 59 түрі бойынша Қазақстан Республикасының чемпионаттары, кубоктары мен біріншіліктеріне қатысып, 366–алтын, 237–күміс, 305-қола медаль жеңіп алды.
