Бүгін Түркістан қаласынан зиялы қауым өкілдері Ұлытау облысына тарихи-танымдық сапарға аттанды. Ардагерлерге ақ жол тілеген қала әкімі Нұрбол Тұрашбеков ақ жол тілеп, салтанатты түрде шығарып салды.
– Мемлекет басшысы Қасым-Жомарт Тоқаев Түркістанды атажұртымыздың алтын қазығы десе, Ұлытауға ұлттың ұясы деп баға берген-ді. Ата-бабалар салған сара жол – бірлік, береке, ынтымақ жолынан бүгінгі ұрпақ та адаспай келеді. Өткенді үлгі тұтар ұрпақ қалыптастыруда өздеріңіздің еңбектеріңіз бен қосқан үлестеріңіз мол. Бұл бағытта бірге атқаратын жұмыстарымыз әлі де көп деп білемін. Сіздерге сәтті сапар тілей отырып, ұлылар мекені Ұлытауға киелі Түркістанның ыстық сәлемін жеткізуді сұраймын, – деді шаһар басшысы.
Ұлт ұясы Ұлытау – қашаннан қазаққа қайырлы қоныс болған киелі мекен. Оның төрінде елдіктің еңселі рухы, бірліктің биік байрағы бар. Көне тарихқа көз жүгіртсек те қазақтың ең тағдыршешті ұлы оқиғалары осынау қастерлі байтақтан бастау алады. Көшпелі түркі халықтары үшін теңдессіз тұлға – Шыңғыс қағанның ұлы Жошы ханның да осы кең сахарада мәңгілік барақат табуы бекер болмаса керек. Қай жағынан алып қарасақ та Ұлытау төрі – өз құдіретімен мыңдаған жылдың бай шежіресін бауырына бүгіп жатқан темірқазық топырақ. Есте болса, Президентіміз Қасым-Жомарт Тоқаев Ұлытауға арнайы келіп, ежелгі Алтын Орданың қайнары саналатын, Ұлық ұлыстың тұғырлы төрі есептелетін іргелі жұртқа айрықша мән беріп келеді. Сондай-ақ, Ұлытаудың етегінде елдіктің еңсесін тіктейтін, ұлттың маңызды мәселелерін көтеретін, жарқын болашаққа жаңа жол салатын Ұлттық құрылтай шақырып, аузы дуалы, айтары бар азаматтардың басын қосқан болатын.
Тарихта белгілі ұлы құрылтайлардың көне жосығымен шақырылған маңызды кеңесті тәуелсіз қазақ елінің жаңа дәуір жолайрығы десе де болғандай. Мәні терең іс-шараға шақырту алған ұлтжанды азаматтар, белгілі тұлғалар тізіміне қарап, келелі басқосуды кезекті бір алқа деуге келмейді. Тұтастықты ту етуге жиылған Құрылтай Жаңа Қазақстанның ертеңгі болашағына баспалдақ бастамадай ұлы рухты оятқан-ды.
Ал бүгінде бұл өңірге Түркістан облыстық зиялы қауым өкілдері аттанып отыр. «Түркілер төрі Түркістаннан – ұлт ұлысы Ұлытауға» тарихи танымдық сапарының мақсаты – егемендіктің шежіресі мен тәуелсіздіктің шынайы тарихын дәріптеу. Қала әкімдігінің ұйымдастыруымен жүзеге асқан іс-шара аясында еңбек ардагерлері, үкіметтік емес ұйым өкілдері, жалпы 50 азамат Ұлытауға жол тартты.
