Түркістан облысы, Сайрам ауданындағы Қ.Жандарбеков атындағы аудандық Мәдениет үйінде ұстаздар күніне орай мерекелік іс-шара өтті. Салтанатты жиынды аудан әкімі Ұласбек Сәдібеков ашып, білім саласының қызметкерлерін кәсіби мерекемен құттықтады. Аталған жиынға аудан әкімінің орынбасары Мадияр Оразалиев, аудан прокуроры Даулет Тлемисов қатысып, «Оқушылар үйі» үйірмесіндегі балалардың сурет салу өнерімен танысты.
Іс-шара шымылдығы №1 Сайрам саз балалар мектебінің орындауындағы «Ұстазым» әнімен ашылды. Мерекелік шарада түрлі деңгейде марапаттар ұйымдастырылып, бірқатар білім қызметкерлері марапатталды.Атап айтқанда, Қазақстан Республикасы Оқу-ағарту министрлігінің Балалардың құқықтарын қорғау комитетінің Құрмет грамотасымен аудандағы Оқушылар үйінің директоры В.Якупова, Түркістан облысының адами әлеуетті дамыту басқармасының Алғыс хатымен №14 Сапарбаев атындағы жалпы орта мектебінің ағылшын тілі пәнінің мұғалімі П.Лапаева және Далабазар жалпы орта мектебінің денешынықтыру пәнінің мұғалімі Т.Юлдашевтер марапатталды.
Одан бөлек, Түркістан облысының іскер әйелдер кеңесінің төсбелгісі ардагер ұстаз, «Нұрбала» және «Димаш», «Раушан ана» бөбекжайларының құрылтайшысы Р.Ерназароваға табыс етілді. Сондай-ақ, бірнеше мектептің пән мұғалімдеріне аудан әкімінің алғыс хаттары табысталды. Келесі кезекте аудандық адами әлеуетті дамыту бөлімі басшысының міндетін атқарушы Қайрат Арап ізгі тілегін жеткізді.
Марапаттау рәсімі жалғасып, республикалық «Үздік педагог — 2022» конкурсының аудандық кезеңінің жеңімпаз мұғалімдері дипломдарға ие болды. Аудан прокуроры және М.Мақатаев атындағы жалпы орта мектебінің жас ұстазы С.Запороженко ыстық ықыласын жолдады.
Іс-шара концерттік бағдарламаға ұласып, білім саласының ардагерлеріне сый-сияпаттар мен құрмет көрсетілді.