1932 жылы құрылған Төлеби ауданы биыл 90 жылдық мерейтойын атап өтеді. Мерекені аудан халқы толағай жетістіктермен қарсы алып отыр. Атаулы датаны жоғары деңгейде өткізу мақсатында жоспар түзіліп жұмыстар кестеге сәйкес атқарылып жатыр.
Төлеби ауданының 90 жылдық мерейтойы қарсаңында Орталық саябақта жаңа үлгідегі ардагерлер үйі пайдалануға тапсырылмақ. Қазіргі таңда ғимараттың ауласын абаттандыру жұмыстары жүргізілуде. Бұл мерейтойға орай іске асатын жалғыз жоба емес.
Мамандардың сөзіне сенсек, бұл нысанға аудан бюджетінен бірде бір тиын жұмсалмапты. Кәсіпкерлер ақсақалдар өздері бірлесіп осындай тарту жасауда. Ғимараттың ішінде 40-50 орындық қымызхана, одан бөлек шахмат ойнайтын орын да болады. Ал әжелерге керемет жабдығымен асхана да бар екн. Ауданның мерейтойына тағы бір тарту- ол спорт кешені болып отыр. Бұл әлеуметтік нысан асар тәсілімен бой көтеруде,- дейді мамандар.
Спорт ғимаратында өлшемі 30*13, ал биіктігі 6 метр күреске арналған залда екі татами дайындалуда. Айта кететін жәйт, бұл нысанның жылу жүйесін де жомарт азаматтар өз есебінен қаржыландырып жасатып берген. Негізгі бөлмеден басқа мұнда киінетін орындар, спортшылар жуынатын орын да қарастырылған. Болашақ чемпиондарға жатақхана да салынады деп жоспарлануда.
Бұдан бөлек, спорт алаңшасы да жаңадан бой көтереді деген жоспар бар. Мұндағы спорттық элементтер, тренажарлардың кепілдік мерзімі де 5 жылға дейін беріліп отыр. Айта кетейік, ауданда бұдан өзге абаттандыру және ағымдағы жөндеу жұмыстары да қолға алынған. Ал Ленгір-Көксәйек бағытындағы айналма жолды абаттандыру жұмыстары жүргізілуде. Ауданның 90 жылдық мерейтойына орай алда өтетін іс шара легі де көп дейді сала жауаптылары. Қуантарлығы айтулы датаға кәсіпкерлер мен халық бірігіп ат салысып жаты.
