Сарыағаш ауданының әкімдігі мен әскери шекара қызметінің ұйытқы болымен әуе қызметіндегі қайтыс болған қызметшілерге арнап «Жүрегіңде жүрсін жақсылық!» атты қайырымдылық марафоны өтті. Марафонды аудан әкімінің орынбасары Нурполат Талипов ашып беріп, қатысушыларға сәттілік тіледі.
-Мұндай марафондар аудан аумағында жылда ұйымдастырылады. Әр аудан тұрғыны осындай қайырымдылық марафонына бей жәй қарамай қатысуы көңіл қуантады. Бұл деген тұрғындардың жаны қашанда жақсылыққа ұмтылып тұруының көрінісі. Құрметті марафонға қатысушылар сіздерге қатысқандарыңызға өз алғысымды білдіріп, баршаңызға сәттілік тілеймін,-деп жылы лебізін білдірді.
Айта өтсек, әр жыл сайын әлемде жүгіру марафондары танымал бола бастады. Қатысушылар саны артып, ал жүгіру жарыстарының ауқымы кеңейе түсті. Ұйымдастырушылар үшін кез келген марафонның негізгі міндеті — қатысушылардың қауіпсіздігін қамтамасыз ету және оны іс-шара туралы жарқын және жағымды естелік қалдыратын нағыз спорттық мерекеге айналдыру. Сол себепті жүгіру кезінде сізге және өзгелердің мейлінше қауіпсіз түрде қатысуына көмектесіп қана қоймай, процестен жағымды эмоция алуға мүмкіндік беретін бірнеше ереже бар, дейді сала жауаптылары.
Ал ауданда өткен қайырымдылық марафонына 100-ден аса тұрғын қатысты. Жыл сайын өткізілетін шара бұқаралық спорттың дамуына да өз септігін тигізері анық. Бұл жолғы шарада марафоншылар А-15 республикалық маңызы бар тасжолдың Тегісшіл елді мекеніне кіре берісінен бастау алып, елді мекен орталығына дейінгі 5 шақырым қашықтықты жүгіріп өтті.
Бұл жүгіру қайырымдылық шарасы болса да, жарысқа жатады. Сондықтан қатысушылар бір-бірінен озуға тырысты. Мәреге алғашқы болып жеткен марафонға қатысушылар арнайы диплом және бағалы сыйлықтармен марапатталды.
