1 қазан — Халықаралық қарттар күні мерекесі Мақтаарал ауданында кең көлемде атап өтілуде.
Ең алдымен, «Тәжі» мейрамханасында аудан әкімі Бақыт Асановтың ақ дастарханы жайылып, қазыналы қарттарға құрмет көрсетілді. Сондай-ақ, «Мақтаарал» мәдениет үйінде мерекеге арналған салтанатты кеш өтті. Қарттар күніне байланысты аудан басшысының тікелей тапсырмасымен аудан аумағындағы барша кенттер мен округтерде де түрлі қайырымдылық іс-шаралары өтуде. Мәселен, А.Қалыбеков ауылдық округі әкімдігінің ұйымдастыруымен бір топ қариялар облысымыздың киелі жерлеріне саяхат жасады. Сондай-ақ, Атакент кенті және Еңбекші ауылдық округі әкімдіктерінің ұйымдастыруымен жасы жүзден асқан қарттарға арнайы себет дайындалып, сыйлық жасалды.
Иә, Түркістан өңірінде жыл сайын бұл күн қарттарымыздың ғұмыр бойы істеген еңбектеріне әрі мемлекетіміздің қалыптасуына қосқан зор үлестеріне сай сый-құрмет көрсетіледі. Биыл да мерейлі мереке өз деңгейінде аталып өтілді.
Қашанда үлкенді сыйлау, қарияны құрметтеу дәстүрі – қазақ халқының ата салты екені белгілі. Елімізде қарт адамдарға деген ықылас жыл сайын артып, мемлекет тарапынан оларға көрсетілетін көмектің көлемі де ұлғайып келеді.
«Әрбір азаматтың қартайған кезіндегі өмірін лайықты ету – мемлекетіміздің әлеуметтік саясатының басты бағыттарының бірі. Осының айқын дәлелі ретінде Мемлекет басшысының Жолдауында көтерілген міндеттердің бірі зейнетақы мөлшері жылдан-жылға артып келеді. Қарттар үшін мемлекет тарапынан көрсетіліп отырған игілікті істер әлі де жалғаса бермек»,дейді сала жауаптылары.
Дей тұрғанмен, жастық шағын еліміздің гүлденуі мен өркендеп дамуына арнап, маңдай терін төккен аталар мен әжелерге құрмет көрсету тек мемлекет тарапынан ғана емес – бүгінгі жас буынның басты парызы екенін де ұмытпаған жөн.
Ал Мырзакент кенті мен Жамбыл ауылдық округтері әкімдіктері қарияларға арнап дастархан жайып, көтеріңкі көңіл-күй сыйлады. Мақтаарал ауылдық округінің әкімі Е.Тұрғанбаев жалғызілікті қарттардың үйлеріне барып, азық-түлік жағынан көмек көрсетті. Айта кетейік, мұндай қайырымдылық іс-шаралары барлық кенттер мен окрутерде жалғасын табуда.
