Түркістанда «Психикалық денсаулық. Заманымыздың жаңа сын-қатерлері» атты халықаралық ғылыми-практикалық конференциясы аяқталды.Үш күнге жалғасқан жиында психикалық денсаулық, оны сақтау және қалпына келтіру, тәуелділік, психологиялық көмек және басқа да мәселелер талқыланды.
Халықаралық іс-шараға Дүниежүзілік денсаулық сақтау ұйымының Қазақстандағы өкілдігі, БҰҰ Есірткі және қылмыс жөніндегі басқармасы, Дүниежүзілік психиатрлар қауымдастығы, Әзірбайжан, Беларусь, Түркия, елдерінің психикалық денсаулық қызметінің өкілдері қатысты.
Статистикалық мәліметтер бойынша пандемия жағдайынан кейін аталған маман иелеріне деген сұраныс артқан. Десе де психикалық ауытқушылықтары бар аурулар саны да азаймай тұр. Аталған аурудың 39,9 % ақыл-ой кемістігі болса, 27,9 % шизофрения түрлі психикалық бұзылыстары бар аурулар құрайды. Осыдан-ақ аталған конференцияның бүгінгі таңда қаншалықты маңызға ие екендігін анық көруге болады.
Аталған шарада, психологияның қазіргі таңдағы маңызды мәселелері, клиникалық психология теориялары, психикалық денсаулық, оны сақтау және қалпына келтіру, емдеуді ұйымдастыру, тәуелділік, психологиялық көмек және басқада мәселелер талқыланып, түрлі секциялық отырыстар мен мастер класстар өткізілді. Халықаралық шараға дүниежүзілік денсаулық сақтау ұйымының өкілдері, әлем елдерінің психиатрларынан 300-жуық мамандар қатысты.
Секциялық отырыстар онлайн және офлайн форматта өткізілді. Оған шетелдік мамандар онлайн қатысып, негізгі тақырып аясында түрлі тәжірибелермен қоса ұсыныстарын да жеткізді. Бүгінгі таңдағы психикалық денсаулыққа байланысты түрлі әдіс түрлері ортаға салынып, талқыланды.
Үш күнге жалғасқан жиынды Республикалық психикалық денсаулық ғылыми-практикалық орталығы (РПДҒПО) Асфендияров атындағы Қазақ ұлттық медицина университеті, ҚР Психикалық денсаулық саласында жұмыс істейтін мамандар қауымдастығы және Қожа Ахмет Ясауи атындағы Халықаралық қазақ-түрік университеті ұйымдастырды.
Айта өтсек, конференцияның алғашқы күні атаулы дерт түрінің таралу себебі талқыланып, тақырып аясындағы баяндамалар оқылды. Одан кейін мамандар тәжірибемен алмасып,түрлі шеберлік сабақтарын да өткізді.
