Түркістан облысы әкімінің баспасөз қызметі осындай жағымды жаңалықпен бөлісті.
Баспасөздің тартақан мәліметі бойынша, жуырда Көкшетау қаласында көкпардан және аударыспақтан жасөспірімдер арасында кезекті Қазақстан чемпионаты өтіп, өз мәресіне жетті. Түркістан облысының құрамасы ұлттық спортының төресі – көкпардан бас жүлдені иеленіп, мерейімізді үстем етті.
Көкпардан жасөспірімдер құрамасын сайысқа Түркістан облысының аға бапкері Бақтыбай Шырынқұлов бастап барды. Жеңіске деген күш-жүгерлері мықты өрендер Көкше жерінде өткен бұл додаға жоғары дайындықпен барыпты. Ұлттық спортымызды жаңғыртып, жаңартып келе жатқан жерлестеріміз жарады.
Көкпар додасына елімізден 10 команда қатысып, екі топ бойынша үздіктер анықталып, плейоф кезеңінде өнер көрсетті. Түркістандық шабандоздар алғашқы кездесуінде Шым қала көкпаршыларын қапы қалдырса, ақтық сында Алматы қаласының балуандарын 12:1 есебімен айқын басымдықпен жеңіп, Ел чемпионы атанды. Бұл жасөспірімдер арасындағы Қазақстан чемпионытында екінші орын Алматы қаласының командасы иеленсе, үшінші орын Жамбыл облысының «Әулие Ата» құрамасында.
Көкше жерінде Аударыспақтан да чемпионат өтті. Қазақтың жүректі де білекті жігіттері жаңғыртып келе жатқан ұлттық спортымыздың бірі – аударыспақтан да жастар жарыс жолына шықты. Республикамыз бойынша 15 командадан 90-ға жуық спортшы қатысқан дүбірлі додада жерлестеріміз 6 алтын, 1 қола медаль еншілеп, бірінші орынды иеленді. Жігіттер 8 салмақ бойынша сынға түсті. Туған елге олжалы оралған сайыпқырандарды Түркістан облысының ұлттық спорт түрлері мектебінің ұжымы зор қошеметпен қарсы алып, оларға сый-құрмет көрсетті,- деп хабарлайды баспасөз өызметі.
Тілге тиек етейік, болашақтары жарқын бұл жеңімпаз жастарымызды тәрбиелеп отырған білікті басшы Ғани Ахметбаев жетекшілік ететін Түркістан облысының ұлттық спорт түрлері мектебінің ізбасарлары.
