Түркістан облысы, Кентау қаласы Ш.Уәлиханов көшесінде орналасқан он көпқабатты 60 пәтерлі тұрғын үйлер газға қосылуға дайын. Бүгін Кентау қаласының әкімі Рашид Аюповтың қатысуымен көпқабатты тұрғын үйлердің газ тарату шкафтарын газбен толтыру жұмыстары іске қосылды. Енді әр пәтер тұрғындары «КазТрансГаз Аймақ» АҚ «Кентау Газ Шаруашылығына» барып дербес шот ашу арқылы үйлерін газға қоса алады.
-Газды құбырларын жасаған мердігер жеке-жеке қосады. Ол үшін әр пәтер тұрғындары үйде болу керек. Газға қажетті пеш дайын болуы қажет. Мамандар әбден тексеріп, қосуға дайын деген кезде кезең-кезеңімен пәтерлерді қосамыз — деді Түркістан облысы бойынша «КазТрансГаз Аймақ» АҚ филиалының директоры Ержан Балабеков.
Қазіргі таңда Кентау қаласы табиғи газбен қамтылып, қала аумағында тұтынушы санын көбейту жұмыстары жүргізілуде, «КазТрансГаз Аймақ» АҚ-на 2063 абонент тұтынушы техникалық шарт алу үшін өтініш берген. Қалада 200-ден аса абонент газбен қамтылған.
-Өте қуаныштымыз. Үйіміздің маңайына газ келді. Қала басшыларына рахмет! Айтқан уәделерін орындады. Енді құжаттарымызды дайындасақ, үйімізге газ қосылады. Жолымыз да салынды, — дейді Ш.Уәлиханов көшесінің тұрғыны Орынкүл Жолдыбай.
— Кентау қаласында Яссауи, Шәкірім, Рысқұлов көшелерінің бойында 7 үй көгілдір отынға қосылды. Олар толықтай құжаттандырылып, заңды түрде газбен қамтылды. Лицевой счет ашылды. Халық уже пайдаланып жатыр газды. Тағы да 40 үйдің техникалық условие ашылды. Енді оларды да газға қосуға дайындап жатырмыз. Айдың аяғына таман 100-ге таман үйге газ өткіземіз деп отырмыз – мердігер компания өкілі Жандос Сабыров.
70 мың тұрғыны бар қалада, алдымен 11 мың тұтынушы көгілдір отынның шарапатын көрмек. Қазір барлық тұрғындарды табиғи газбен қамту үшін құжаттарды рәсімдеу жұмыстары жүргізілуде. Сала мамандарының айтуынша күзге дейін 18 200 абоненттің барлығына газ жеткізілмек. Сондай-ақ, алдағы 2 жылда Кентау қаласына қарасты 4 ауылға көгілдір отын тартылады деп күтілуде.
Жалпы қаланы табиғи газбен қамтудың ІІ кезеңі нысанында қысыммен тексеру жұмыстары жүргізілуде. Оны биыл тамыз айының соңында аяқтау жоспарланған.
