Облыс орталығындағы «Керуен сарай» туристік кешенінде Сарыағаш ауданының мәдениет күндері өтті. «Түркістан текті төріміз» атты үш күндік концерттік бағдарламада «Түркістан төрінде – саялы Сарыағаш» тақырыбында кеңейтілген кітап көрмесі, қолөнер көрмесі, аудан өнерпаздарының концерті ұйымдастырылды.Бұл туралы Түркістан облысы әкімінің баспасөз қызметі мәлімдеді.
Облыс әкімінің бекітілген тапсырмасымен 2022 жылдың 4 наурызынан бастап «Түркістан – Түркі әлемінің жүрегі» атты аудан, қалалардың Түркістан қаласындағы мәдениет күндері тұрақты түрде өткізіліп келеді. Мәдени іс-шараға Сарыағаш ауданының зиялы қауым өкілдері, өнерпаздары және қала тұрғындары мен қонақтары қатысты.
Мерекелік шарада ауданнан шыққан өнер майталмандары, Сарыағаш аудандық мәдениет үйінің өнерпаздары, «Саялы Сарыағаш» этно-фольклорлық ансамблі мен «Сарыағаш» вокалды аспаптар ансамблі халықаралық, республикалық және облыстық байқау жеңімпаздары, аудандық мәдениет үйіне қарасты ауылдық мәдениет үйлері мен клубтарының өнерпаздары көпшілікке көтеріңкі көңіл-күй сыйлады.
Сарыағаштық өнерпаздардың өнеріне тәнті болған көрермендер оларға өз бағасын беріп, аталмыш концертті ұйымдастыруға мұрындық болған жандарға алғысын білдірді. Аталған 3 күн ішінде көпшілік сарыағаштықтардың өнерін ғана тамашалап қоймай, «Шебер қолдар» және «Жәдігер жауһарлар» атты тарихи көрме, сондай-ақ «Қарашығымдағы Сарыағашым» атты фото көрмесімен танысты. Ұйымдастырушылардың айтуынша аталған концерттік шара қала тұрғындары мен қонақтарына мәдени әрі рухани демалыс сыйлау мақсатында өткізіліп жатыр. Көпшілік шараның алғашқы күндері Сарыағаш мәдениетімен таныс болса, алдағы уақытта өзге аудан өнепрпаздарының да өнеріне куә болмақ.
