Елімізге ақындық өнерімен танымал тұлға, қоғам белсендісі Ә.Ысқақтың Қ.Жандарбеков атындағы аудандық мәдениет үйінде «Жүректегі Жазулар» атты шығармашылық кеші өтті.
Әкім Әбдіхайымұлы — Қазақстан Республикасы Жазушылар одағының мүшесі, Бірінші шақырылған Парламент Мәжілісінің депутаты, Ордабасы, Сарыағаш, Сайрам аудандарының Құрметті азаматы, «Құрмет» орденінің иегері, Қазақстан Республикасының Мәдениет қайраткері,
ақын–жазушы, сазгер, қаламгер, сатирик.
Кешке келген оқырмандар автордың өлеңдерін оқып, Алматы қаласы мен жергілікті әншілер әндерін тамаша орындап, көпшілікке әсерлі көңіл-күй сыйлады.
Еліміздің бас қаласынан академик, халықаралық дәрежедегі «Гиппократ» алтын орденінің иесі Жасан Зекейұлы, Президент оркестрінің әншісі, республикалық, халықаралық байқаулардың лауреаты Әлібек Ізбасаров, Алматы қаласынан ақын , «Алаш» сыйлығының лауреаты Әлібек Толыбай, композитор Құрасбек Байтоқаев, әнші Гаухар Тоқайқызы, Қазақ радиосында автордың әндерін әдемі әуенмен шырқап жүрген әнші Әйгерім Шерхан, Кентау қаласынан ақын–композитор Жұпаркүл Бекшораева секілді тұлғалар арнайы келіп, жылы лебіздерін жеткізіп, сазды әуендерін арнады.
Ауданымыздың құрметті азаматтары Әлібек Байназар, Амангелді Қабылбеков ағаларымыз және автордың «Алтыным» атты кітабын өзбек тіліне аударған жас қаламгер Мафтуна Нажиева мен аудандық орталық кітапхана қызметкерлері автордың шығармаларына арналған көрмемен таныстырып, ақынға құрметтерін көрсетті.
Кездесу барысында Әкім Әбдіхайымұлының жаңа екі әнінің тұсауы кесілді. Олар Ажар Сламованың сөзіне жазылған Ә.Ысқақтың әні «Кеудемдегі күйсандық» және ақынның сөзіне жазылған Құрасбек Байтоқаевтың әні «Ана».
Осыған дейін ақынның жаңа әндерінің тұсауы Алматы, Тараз және Астана қалаларының сахналарында кесілді.
Ал, бүгін аудан өнерпаздары үшін сазгер ағамыз жаңа туындыларын сайрамдық әншілердің сыйға тарту етті.
Шығармашылық кездесу барысында аудандық мәдениет үйінің директоры Д.Алашбаев кеш иесі Әкім Әбдіхайымұлын аудан әкімі Ұласбек Сәдібековтің арнайы алғыс хатымен құттықтап, марапаттады.
Сонымен қатар, автор аудандық орталық балалар кітапханасында өткен «Әкім Ысқақ оқулары — 2022» аймақтық байқауының жүлдегерлерін марапаттап, ауданның әдебиет пен өнерсүйер қауымына және әншілеріне алғысын білдірді.
Сайрам ауданы әкімінің баспасөз қызметі
