Түркістан облысында биыл ауыл шаруашылығы дақылдары 851 мың гектарға орналастырылып, дала жұмыстары толығымен аяқталды. Егіс көлемі өткен жылдан 5,5 мың гектарға ұлғайды (2021 ж. – 845,5 мың га).
Егістікті әртараптандыруға сәйкес, масақты дақылдардың егіс көлемі 7,1 мың гектарға артып, 248,6 мың гектарға орналастырылды (оның ішінде бидай – 201,2 мың га, арпа – 47,5 мың га).
Астық оруға қолда бар 800-ге жуық комбайнның 90-95%-ы қатысуда. Бүгінгі күнге 23,5 мың гектар астық орылып (10%), гектар түсімділігі 17,2 центнерді құрады, 40,3 мың тонна астық қамбаға құйылды. Биыл алдын-ала жасалынған болжамдық есеп бойынша әр гектардан орташа 18,7 центнерден, жалпы 465,1 мың тонна өнім жиналады деп күтілуде. Бұл өткен жылғы көрсеткіштен 203 мың тоннаға артық.
Айта кетейік 2022 жылғы 30 қыркүйекке дейін Қазақстан аумағынан бидай мен меслинді, бидай және қара бидай ұнын әкетуге квоталар енгізілуде.
Бұл туралы Мемлекеттік кірістер комитеті хабарлады. Қазақстан аумағынан жекелеген тауарларды әкетудің кейбір мәселелері туралы» Ауыл шаруашылығы министрінің м.а. 2022 жылғы 5 шілдедегі бұйрығымен ел аумағынан үшінші елдерге және Еуразиялық экономикалық одақ елдеріне 550 000 тонна көлемінде бидай мен меслинді және 370 000 тонна көлемінде бидай және қара бидай ұнын әкетуге сандық шектеулер енгізіледі. Шектеулер 2022 жылғы 8 шілдеден бастап 30 қыркүйекке дейін күшінде болмақ, – деп жазды ведомство.
Бидай мен меслинді, бидай және қара бидай ұнын әкетуге сандық шектеулер ел ішінде азық-түлік қауіпсіздігін қамтамасыз ету мақсатында қолға алынды.
Бұл ретте бұйрық қолданысқа енгізілген күнге дейін ҚР және ЕАЭО кедендік заңнамасына сәйкес экспорттың кедендік рәсімі бойынша орналастырылған және шығарылған тауарлар Қазақстан Республикасының аумағынан кедергісіз әкетуге жатады.
Түркістан облысы әкімінің баспасөз қызметі
