«Мейірімділік — адам бойындағы ең ізгі қасиеттердің бірі». Түлкібас ауданында мектеп бітіргендеріне 20 жыл толған түлектер, көпбалалы мұқтаж отбасыға тұрғын үй алып берді. Үйлі болған Хажібековтер отбасы көп жылдан бері баспанаға қол жеткізе алмай жүргенін айтып, қасиетті Рамазан айында түлектерге алғысын жеткізді.
Абай мектеп-лицейі Түлкібас ауданының білім ошақтарының ішіндегі қара шаңырағы саналады. Аталмыш білім ұясын 2000-шы жылы бітірген түлектер «Қамқорлық» жобасының қатысушысы көпбалалы мұқтаж отбасыға аудан орталығынан 5 бөлмелі үйді сыйға тартты. Жалдамалы пәтерде тұрып келген отбасы мүшелері үй иесінің бірінші топ мүгедектігіне берілетін жәрдемақы мен атаулы әлеуметтік көмек қаржысына күн көріп отыр.
Арман Абсиметов- Абай мектеп-лицейінің түлегі
Айта кетерлік, Түлкібас ауданында облыс әкімі Өмірзақ Шөкеевтің бастамасымен қолға алынған «Қамқорлық» жобасы бойынша 93 аса мұқтаж отбасыға аудан әкімдігі және демеушілер тарапынан жан-жақты қолдаулар көрсетілуде. Бүгінгі таңда жоба аясында баспанаға мұқтаж екі отбасы жомарт жандардың демеушілігімен үйлі болыды. Кезекті қуаныш иелеріне үйдің кілтін осы мектепті 56 жыл бұрын бітірген Мархабат Байғұт ағамыз табыстады.
Бұндай игі шара Түлкібас ауданында бірінші рет қолға алып отырған жоқ. Соңғы екі жыл қатарынан дәл осы Абай мектеп лицейінің 1998 және 1999 жылы бітірген түлектері көпбалалы мұқтаж екі жалғыз басты анаға аудан орталығынан үй сыйға тартқан болатын. Осылайша түлкібастықтар бүкіл қазақ еліне үлгі боларлықтай игі істі дәстүрге айналдырып отыр.
Ұлдана Байниязова
