Шымкент қаласының әкімі Мұрат Әйтенов Еңбекші ауданы аумағындағы Базарқақпа тұрғын алабына арнайы барып, «Сайрам су» өзені арқылы өтетін апатты жағдайдағы темір көпірді аралап көрді.
Базарқақпа тұрғын алабындағы Сайрам-су өзені үстінен өтетін аспалы темір көпір 1994 жылы тұрғындардың өз есебінен салынған болатын. Темір көпірді қайта-қайта су шаюына байланысты тұрғындар өз есебінен қайта қалпына келтіру жұмыстарын жүргізіп отырды. Ал 2020 жылы көпір апатты жағдайда болуына байланысты қолданыстан алынып тасталды.
Ені 5 метр, ұзындығы 18 метр көпірді қайта құру жұмыстарын жүргізу қажет. Еңбекші ауданына қарасты №12 қалалық аурухана және Қаратау ауданына қарасты орталық аурухана ортасын байланыстарын көпірдің тұрғындар үшін маңызы зор.
Демеушілер есебінен жаңадан салынатын көпірдің жобалық-сметалық құжаттамалары дайындалды.
Сондай-ақ, қала әкімі Базарқақпа тұрғын алабындағы көпқабатты тұрғын үйлердің кәріз жүйесімен танысты. Дружба, Жамалов, Юсупов және Шахайдаров көшелерінде 20 көпқабатты (275 пәтер), 100 жеке тұрғын үйдің кәріз жүйесі құрылысын «ТКСК-Строй» ЖШС жүргізген.
Тұрғын алаптағы кәріз жүйесін мемлекет меншігіне өткізіп, ішкі кәріз жүйелерін магистральды жүйеге қосуға қаржы қарастыру қажет.
Қазіргі таңда Шымкент қаласының энергетика және инфрақұрылымды дамыту басқармасы тарапынан жаңа магистральдық кәріз жүйесін орнату үшін техникалық шарттар мен ЖСҚ әзірлеуге қаржы бөлу үшін бюджеттік нақтылау отырысына ұсыныс енгізілген.
