Президент пен ІІМ-нен көмек сұраған полиция қызметкерінің видеосы фейсбуктегі parvo.kz парақшасында жарияланған.
«Президент мырза! Құрметті Қасым Жомарт Кемелұлы! Құрметті Ішкі істер министрі Ерлан Заманбекұлы! Сізден көмек сұраймын, мен Шымкент қаласы ІІД-ның адал полиция қызметкерімін, рота командирімін. Мен Шымкент қалалық ішкі істер басқармасының бастығы М.Бұхарбаевтың өз өкілеттігін асыра пайдаланып, маған қымбат заттар сатып алуға мәжбүрлегені туралы Ішкі істер министрлігіне хабарлама жолдадым. Нәтижесінде дәлелдеме бердім.
Алайда, барлық дәлелдерге қарамастан, М.Бұхарбаев әлі жұмыс орнында. Бұны қалай түсінуге болады? Қазірдің өзінде іс Шымкент қалалық ҰҚК-не жіберілген. Бірақ әлі де созбалануда. Маған белгісіз біреулер келіп, рапортты қайтарып алу үшін 10 миллион теңге ұсынып жатыр. Дегенмен мен адал полицеймін, олай істей алмаймын. Департамент басшысы Ералы Жұмаханбетов оны неге орнында ұстайды? Президент мырза, мен барлық полиция қызметкерлерінің халық алдында адал болғанын қалаймын. Мен халыққа және Cізге қызмет етемін! Өтінемін маған көмектесіңіз»- деп сөзін аяқтады Шымкенттік полицей.
