Шымкент қаласында Есіркеп батыр атындағы 21-ші республикалық турнир өтті. Ел Тәуелсіздігінің 30 жылдығы қарсаңындағы додаға еліміздің 14 облысынан 200-ге жуық спортшы бақ сынады.
Жоғары деңгейде ұйымдастырылған сайыста 46 келі салмақ дәрежесінде Түркістан облысының балуаны Ырыс Жаманқұл жеңімпаз атанды. 50 келіде шымкенттік жас өрен Мұқтар Алиевтің мерейі үстем болды. 55 келіде қарағандылық Алдияр Каргулов қарсыластарынан басым түссе, 60 келі салмақта Жамбылдың жампозы Әли Әлимби жеңімпаз атанды. 65 келіде Шымкент сайыпқыраны Паржан Бақтияр қарсылас шыдатпаса, 70 келіде Алматы облысының балуаны Жігер Еркінұлы қарсыластарын жеңіп шықты. 76 келіде қызылордалық Ернұр Исахан чемпион атанса, 82 келіде М.Дүйсенбаев топ жарды. Ал ауыр салмақта Нұр-Сұлтан қаласының балуаны Мейіржан Сламшайықов жеңімпаз болды.
Көпшілік тағатсыздана күткен «түйе балуандар» бәсекесіне 32 балуан қатысуға ниет білдірді. Болашақ «Қазақстан барыстарының» арасындағы сында түркістандық Мақсат Махматхашамұлының мерейі үстем болып, бас жүлдеге тігілген «темір тұлпарға» ие болды. Ал турнирдің үздік спортшысы болып қызылордалық Нұрлыбек Әсенов танылды.
Шымкент төріндегі дүбірлі доданың жеңімпаздары мен жүлдегерлері диплом, медаль және бағалы сыйлықтармен марапатталды.
