Шымкентте бір топ әйелдің Шымкент қаласы әкімдігіне барып, «Әйтенов шық!», — деп шулап жатқан видеолары әлеуметтік желіде кең тарады. Онда тұрғындар жарық пен ауыз су мәселесін айтып арыздануда. Олардың айтуынша Шымкент қаласының әкімдігі 3 жылдан бері тұрғындардың жанайқайына құлақ аспай келеді.
-Шымкент қаласы әкімдігіне свет, су мәселесі бойынша осымен үшінші жыл келіп жүрміз. Қала әкімі бізбен ешқандай кездесуге шықпайды.Міне 102 шақырып, әйелдерді қорқытып жатыр әр бұрышқа алып барып. Бала-шағамен келіп тұрмыз.Бала шағамен еріккен адам осындай жерге келе ма? Міне қарапайым халық қиналғаннан кейін светі жоқ, суы жоқ. 5 км жерге балаларымыз лайды кешіп,жаяу сабаққа барып жүргеннен кейін осылай қиналып келіп тұрмыз . Қала әкімі шығып бір ауыз сөз айтуға жарымайды.Тағы бізге 102 шақырып мына әйелдерді қорқытып, сендердің үстеріңнен заңды түрде шара қолданамыз деп қортқытып жатыр. Журналистер сіздерді көмекке шақырамыз! — деді шағымын арқалап келген тұрғындардың бірі.
Тұрғындардың шағымын тыңдауға қала әкімі Мұрат Әйтеновтың келмегенін видеодан анық аңғаруға болады. Есесіне шулаған тұрғындарды сабырға шақыруға Шымкент қаласы энергетика және инфрақұрылымды дамыту басқармасының басшысы Боранбай Булатбеков шыққан. Салаға жауапты басшы мәселенің нақты қашан шешілетінін айта алмаған. Ол жұмысқа немқұрайлы қараған мамандарға шара қолдандылады деген жауаппен шектелген. Шенеуніктің жауабына қанағаттанбаған тұрғындар Әйтеновтың шығып, мәселені шешіп беруін талап еткен. Шыдамы таусылғандар «Әйтенов шықсын! Әйтенов шықсын! – деп айқайға басқан.
Шағымын айтып шырылдаған тұрғындар Шымкент қаласы әкімінің орынбасары Мәулен Айманбетовпен кездесуден соң әрең тарқаған.
Ақпараттарға сүйенсек, қала әкімдігіне мәселесін арқалап келгендер Еңбекші ауданына қарасты, Қарабастау тұрғын алабы, Жаңа тұрмыс ықшам ауданының тұрғындары. Халықтың айтуынша, ықшам ауданға әлі күнге ауыз су, электр қуаты мен көгілдір отын тартылмаған. Балаларымыз лай жолмен 5 км жердегі мектепке баруға мәжбүр,- дейді ашынған жұрт.
Ескерту : Видео «You Tube» әлеуметтік желісінің ашық көздерінен алынған
