Санаулы сәттер бұрын Литваның Каунас қаласындағы «Жальгирис-Аренада» Қазақстан құрамасы Тайландты 7:0 есебімен жеңіп, футзалдан Әлем чемпионатының ширек финалына шықты.
Голдар: Дәурен Тұрсағұлов (3-мин), Дуглас (4-мин), (Чайвата Джамграджанга, автогол, 19-мин), Дәурен Нұрғожин (24-мин), Тайнан (24-мин), Арнольд Кнауб (32-мин), Игита (38-мин).
Ойынды қарқынды бастаған Кака шәкірттері есеп ашып қана қоймай, еселеп үлгерді. Әуелі Дәурен Тұрсағұлов өкшемен теуіп әдемі гол салды. Ізін ала бұрыштама добынан кейін Дуглас жойқын соққымен есепті 2:0-ге жеткізді. Қазақстан құрамасы матчтың тізгінін қолда ұстап, бірінші таймның соңғы минуттарында тағы бір гол салды.
Екінші жиырма минуттықты қорғаныста бастағанымен қазақстандық ойыншылар үш рет қарсыласты қапы қалдырды. Ал 17-минутта әлемнің бес дүркін үздік қақпашысы атанған Игита жетінші голды торда тулатты.
23-қыркүйек күні Қазақстан футзалшылары Тайландпен төртінші рет кездесті. Екі құрама арасындағы 2000 жылғы алғашқы кездесуде ұлттық құрама (4:3) басым түссе, 2016 жылы (3:3) тең тарқасты. Осыған дейінгі 2017 жылғы ойында Қазақстан (2:1) жеңіске жеткен.
Қазақстан футзалдан әлем чемпионатында ең үздік нәтижесін тіркеді. Енді Қазақстан ширек финалда 27 қыркүйекте Иран-Өзбекстан жұбының жеңімпазымен жартылай финал жолдамасын сарапқа салады.
