Үшінші мегаполисте жаңа 2021-2022 оқу жылы дәстүрлі форматта басталады. Бұл туралы ақпараттық-коммуникациялық орталықта өткен баспасөз жиынында Шымкент қаласы білім басқармасының басшысы Жанат Тәжиева мәлімдеді.
Спикердің айтуынша, шаһардағы 30 мыңға жуық педагог пен білім беру мекемелерінің қызметкерлері екпе салдырған. Қарсы көрсетілімі бар 3126 мұғалім анықталған. Дегенмен, қаладағы білім ошақтары жаңа оқу жылына дайын.
– Білім алушы ауырған жағдайда сынып қашықтықтан оқытуға жіберіледі. Науқас және байланыста болған ата-аналар жағдайында балалар қашықтықтан білім алады. Бөгде адамдарға кіруге тыйым салынады. Бір сынып — бір кабинет талаптары сақталады, — деді басқарма басшысы.
Жанат Арысбекқызының айтуынша, балалар мен педагогтер денсаулығының қауіпсіздігін сақтау мақсатында білім беру ұйымдарын қажетті санитарлық және дезинфекциялық құралдармен қамтамасыз ету жұмыстары жүргізілуде.
