Бүгінде Шымкентте коронавирусқа қарсы екпе алатындардың қатары артуда. Егу науқаны басталғалы шаһарда барлығы 130 мың 140 адам вакцинацияланды. Өткен тәулікте қалада 11 мың 218 адам вакцина алды: I компонент – 5983, II компонент – 5235.
Қазіргі таңда мамандандырылған инфекциялық стационарларда барлығы 1 406 орын бар. Төсек-орын толымдығы – 51 %, 683 төсек-орын бос.
Қала аумағында санитарлық-эпидемиологиялық талаптардың сақталуы бойынша 24 мобильдік топ жұмыс атқаруда. 4 мамыр күні 270 нысанға (266 кәсіпкерлік нысан, 4 жеке нысан) тексеру жүргізілді. Оның ішінде 8 нысанда карантин режимінің талаптары бұзылғандығы анықталып, әкімшілік хаттамалар толтырылды.
Осы орайда, медицина мамандары қала тұрғындарына бетперделік режимді сақтап, өз денсаулықтарына жауапкершілікпен қарауға шақырады. Індетті жеңудің бірден-бір жолы – вакцина егу екенін естен шығармайық.
Айта кетейік, өткен аптадан бастап Шымкентте егу пунктерінің жұмысы түнгі 24:00-ге дейін ұзартылды. Қазір қалада 45 екпе егу пункті жұмыс істеуде. Кез келген қала тұрғыны екпе егу пункітіне барып ақысыз КВИ-ге қарсы вакцина салдыра алады. Ол үшін азамат қаладағы мемлекеттік немесе жекеменшік емханалардың бірінде тіркелген болуы керек.
Шымкент қаласының Ақпараттық-коммуникациялық орталығы
