Түркістан облысында Қазақстан Республикасы Тәуелсіздігінің 30 жылдығына орай «Nur Otan» партиясының «30 игі іс» жобасы аясында «Дәрігерлерді ардақтайық!» қайырымдылық акциясы өтіп жатыр. Бүгін бұл акция Түркістан қаласында Түркістан облыстық «Jas Otan» ЖҚ ұйымдастыруымен жалғасын тапты.
Жасотандықтар Түркістан қалалық ауруханасы жанындағы «Жұқпалы аурулар» бөлімі және облыстық патология және анатомиялық бюро қызметкерлеріне арнап азық-түлік себеттерін тапсырды. Бұл іс-шара «Nur Otan» партиясы Түркістан облыстық филиалы төрағасының орынбасары, мәслихат депутаты Калыйма Жантөреева, Түркістан қалалық мәслихатының депутаттары Жансерік Жұман және Угилжан Васитованың қолдауымен өтті. Акцияға жалпы саны 20-дан астам белсенді қатысты. Жауапкершілігі мол мамандық иелері бір сәт жастардың жылы лебізінен қуат алып, серпіліп қалды.
«Елімізде пандемия әлі тоқтаған жоқ. Өкінішке қарай, облыс аумағында қауіпті індетке шалдыққандар саны көбейіп жатыр. Біз осы ретте қиындықпен бетпе-бет жүздесіп, дәрігерлер қауымына қолдау көрсетуді жөн деп таптық. «Nur Otan» партиясының облыстағы барлық аудан, қалаларында осындай акциялар қолға алынған. Жасотандықтар «Дәрігерлерді ардақтайық!» жобасы аясында дәрігерлерге құрмет көрсетіп жатыр», – дейді облыстық мәслихат депутаты Калыйма Жантөреева.
«Nur Otan» партиясы Түркістан облыстық филиалының баспасөз қызметі
