Шымкент қаласының әкімі Ғабит Сыздықбеков Тұран ауданындағы бірқатар елді мекен тұрғындарымен көшпелі кездесу өткізіп, аумақтардың әлеуметтік-экономикалық және инфрақұрылымдық дамуына қатысты мәселелерді талқылады. Кездесу барысында тұрғындар өздерін толғандырған сұрақтарды тікелей қала басшысына жеткізіп, оларды шешуге қатысты ұсыныстарын білдірді.
Көшпелі кездесу Жаңаталап шағынауданы, Абай даңғылы бойындағы тұрғындар, сондай-ақ Ақжар және Ақтас-2 тұрғын алаптарын қамтыды. Бұл аумақтарда халық санының өсуіне байланысты инженерлік және әлеуметтік инфрақұрылымға деген қажеттілік те артып келеді. Осыған байланысты тұрғындар үшін күнделікті өмірге тікелей әсер ететін мәселелерді шешу негізгі назарға алынды.
Атап айтқанда, жер қатынастары, тұрғын үй сертификаттарын алу, елді мекендерді газбен қамтамасыз ету, ағын су мәселесі, тұрмыстық қалдықтарды уақытылы шығару және жасыл желектерді күтіп-ұстау жөнінде ұсыныстар айтылды. Тұрғындар аталған бағыттардағы жұмыстардың жүйелі жүргізілуі аумақтың жайлылығын арттыруға мүмкіндік беретінін жеткізді.
Кездесуде әлеуметтік инфрақұрылымды дамыту мәселесіне де ерекше мән берілді. Жаңаталап шағынауданында тұрғындар мектеп пен спорт кешенін салу қажеттігін көтерді. Ал Ақжар тұрғын алабының өкілдері Мәдениет үйі мен балалар ойын алаңын салу мәселесін ұсынды. Мұндай нысандардың болуы тұрғындардың, әсіресе балалар мен жастардың бос уақытын тиімді ұйымдастыруға мүмкіндік бермек.
Көлік инфрақұрылымы да тұрғындар назарынан тыс қалмады. Кездесу барысында қоғамдық көліктердің қатынау жиілігін арттыру, қосымша бағдаршамдар орнату және білім беру ұйымдарының маңында жаяу жүргіншілер өткелдерін ұйымдастыру жөнінде ұсыныстар айтылды. Бұл мәселелер жол қозғалысының қауіпсіздігін қамтамасыз ету және тұрғындардың күнделікті қатынасын жеңілдету тұрғысынан маңызды.
Тұрғындар көтерген мәселелердің бірқатары кездесу барысында қаралып, тиісті шешімдер қабылданды. Қосымша зерделеуді қажет ететін өтініштер бойынша жауапты басқармалар анықталып, алдағы жұмыстардың бағыттары белгіленді.
Қала әкімі Ғабит Сыздықбеков тұрғындардың ұсыныстары назардан тыс қалмауы керектігін айтып, аудан әкімдігіне халықпен кері байланысты күшейтуді тапсырды. Сонымен қатар қабылданған шешімдер мен атқарылған жұмыстардың нәтижесі туралы тұрғындарды тұрақты түрде хабардар ету қажеттігі айтылды.
Көшпелі кездесулердің басты ерекшелігі – тұрғындардың мәселесін жергілікті жерде зерделеп, жауапты сала мамандарымен бірге нақты шешу жолдарын қарастыру. Мұндай кездесулер қала аумақтарын дамыту кезінде халықтың ұсыныстары мен қажеттіліктерін ескеруге мүмкіндік береді.
Тұран ауданындағы жұмыстар алдағы уақытта да кезең-кезеңімен жалғасып, инженерлік, әлеуметтік және көлік инфрақұрылымын жетілдіруге бағытталмақ. Тұрғындар тарапынан көтерілген ұсыныстардың іске асуы ауданның тұрмыс сапасын жақсартуға және қолайлы қалалық орта қалыптастыруға ықпал етеді.
