Шымкентте жастардың цифрлық сауаттылығын арттыру және интернет-алаяқтықтың алдын алу бағытындағы түсіндіру жұмыстары жалғасып келеді. Қалада ұйымдастырылып жатқан кездесулер барысында студенттерге киберқауіптердің негізгі түрлері, жеке деректерді қорғау және интернетті қауіпсіз пайдалану жолдары түсіндірілуде.
Кезекті ақпараттық-түсіндіру кездесуі Жұмабек Тәшенев атындағы университетте өтті. Жиынға студенттер мен оқытушылардан бөлек, цифрландыру саласының мамандары, құқық қорғау органдарының қызметкерлері және заңгерлер қатысты.
Кездесудің негізгі мақсаты – жастарға интернет кеңістігінде кездесетін қауіптер туралы ақпарат беру, кибералаяқтардың қолданатын әдістерін түсіндіру және күнделікті өмірде сақталуы тиіс цифрлық гигиена талаптарын үйрету.
Шымкент қаласының цифрландыру басқармасының басшысы Мұхит Кемеловтің айтуынша, қалада интернет-алаяқтықтың алдын алу жұмыстары бірнеше мемлекеттік органның бірлескен іс-қимылы арқылы жүргізіліп келеді. Негізгі бағыттардың бірі – оқушылар мен студенттерді кеңінен қамтып, оларға цифрлық қауіпсіздіктің қарапайым әрі тиімді тәсілдерін түсіндіру.
Мамандардың айтуынша, интернеттегі қауіптерден қорғану үшін міндетті түрде күрделі техникалық білім қажет емес. Ең маңыздысы – күнделікті цифрлық әдеттерге жауапкершілікпен қарау. Күмәнді сілтемелерді ашпау, белгісіз адамдарға жеке мәліметтерді бермеу және аккаунттарды қосымша қорғау сияқты қарапайым ережелер көптеген қауіптің алдын алуға мүмкіндік береді.
Кездесу барысында жеке деректердің қауіпсіздігіне ерекше назар аударылды. Сарапшылардың түсіндіруінше, алаяқтар азаматтардың логині мен құпиясөздерін алу үшін жалған сайттар мен фишингтік сілтемелерді жиі пайдаланады.
Мұндай сайттар сыртқы көрінісі жағынан танымал интернет ресурстарына ұқсас болуы мүмкін. Алайда сайттың мекенжайында бір немесе бірнеше таңба өзгертіліп, қолданушы байқамай өзінің логині мен құпиясөзін енгізуі ықтимал. Сондықтан кез келген сайтқа кірген кезде оның мекенжайын мұқият тексеру маңызды.
Студенттерге аккаунттарды қорғаудың негізгі тәсілдері де көрсетілді. Атап айтқанда, әр сервиске күрделі әрі қайталанбайтын құпиясөз қолдану, екі факторлы аутентификацияны қосу және әлеуметтік желілердегі жеке парақшалардың қауіпсіздік параметрлерін тексеру ұсынылды.
Сонымен қатар белгісіз адамдардан келген хабарламаларға, күмәнді жарнамаларға және асығыс шешім қабылдауға итермелейтін ұсыныстарға сақтықпен қарау қажеттігі айтылды. Қандай да бір сілтемені ашпас бұрын оның қайдан келгенін тексеру де маңызды.
Кездесу ашық диалог форматында өтті. Студенттер мамандарға интернет-алаяқтықты қалай ажыратуға болатыны, фишингтік шабуылдардан қалай қорғану керектігі және әлеуметтік желідегі аккаунттарды қауіпсіз сақтау жолдары бойынша сұрақтар қойды.
Цифрлық технологиялар жастардың күнделікті өмірінде кеңінен қолданылатындықтан, интернет қауіпсіздігі мәселесіне назар аудару маңызды. Әлеуметтік желілер, онлайн сервистер және электронды төлем құралдары арқылы көптеген операция жүзеге асырылатын қазіргі жағдайда жеке ақпаратты қорғау әр адамның күнделікті міндеттерінің біріне айналып отыр.
Шымкентте жастардың цифрлық сауаттылығын арттыруға бағытталған профилактикалық жұмыстар алдағы уақытта да жалғасады. Мұндай түсіндіру кездесулері интернеттегі қауіптерді ерте анықтауға, жеке деректерді қорғауға және қауіпсіз цифрлық мінез-құлық қалыптастыруға бағытталған.
