Ұлыстың Ұлы күні — Наурыз мейрамы қарсаңында Түркістан облысы жеке сот орындаушылары өңірлік палатасының ұйымдастыруымен ағаш отырғызу шарасы болып өтті. Шара аясында жеке сот орындаушылар киелі шахардың кіре берісіндегі саябаққа 150 түп арша, шырша және туя ағаштарын отырғызды. Қылқанды жапырақты бұл ағаштар Түркістан қаласының шырайын арттырып қана қоймай, экологиялық ахуалды жақсартуға септігін тигізетін болады. Түркістан облысы жеке сот орындаушылары өңірлік палатасының төрағасы Мақсат Сауран туған жерді абаттандыру – әр адамның қызметтік қана емес, азаматтық парызы екендігін айтады.
-Ата бабаларымыздың «Гүл ек, тал ек – туған жерді түлет» деген керемет даналығы бар. Осыны ескере отырып, біз Наурыз мейрамына орай облыс орталығы — Түркістан қаласына мерекелік тарту жасап отырмыз. Болашақта бұл жасыл желектер күн санап гүлденіп келе жатқан киелі шахармен бірге жайқалатындығына сенеміз. Наурыз мейрамы баршамызға құтты болсын! – деді Мақсат Зұлбұхарұлы.
Шара барысында саябақтан «Түркістан облысы жеке сот орындаушыларының алеясы» ашылып, арнайы тақта орнатылды.
Айта кетейік, Түркістан облысының қала аудандарында барлығы 150-ге тарта жеке сот орындаушылар қызмет етеді. Олар жұмыспен қатар түрлі спорттық, мәдени, қайырымдылық шараларды ұйымдастыруда белсенділік танытып келеді.
