Шымкент қаласында халықтың әлеуметтік әл-ауқатын арттыру және тұрғындарды қолжетімді азық-түлікпен қамтамасыз ету мақсатында әлеуметтік маңызы бар азық-түлік тауарларының бағасын тұрақтандыру бағытындағы жұмыстар қарқынды түрде жалғасуда. Бұл бағытта қала әкімдігі, отандық тауар өндірушілер мен ірі сауда желілері арасында тиімді ынтымақтастық орнатылып, тұрғындарға күнделікті тұтынатын өнімдерді нарықтағы бағадан төмен бағамен ұсыну шаралары қолға алынған.
Әлеуметтік маңызы бар азық-түлік өнімдерінің бағасын тұрақтандыру бүгінгі таңда мемлекеттік саясаттың маңызды бағыттарының бірі саналады. Себебі азық-түлік бағасының тұрақтылығы халықтың тұрмыс сапасына тікелей әсер етеді. Осыған байланысты Шымкент қаласында тұрғындарды сапалы әрі қолжетімді өнімдермен қамтамасыз ету үшін бірқатар нақты жобалар жүзеге асырылып келеді.
Қазіргі уақытта қаладағы ірі сауда орындарының бірі саналатын «Грамад», «Магнум», «Маркет» сауда желілерінде арнайы келісімдер негізінде әлеуметтік маңызы бар азық-түлік өнімдері төмендетілген бағамен сатылуда. Сонымен қатар «Қасқасу-С» және «Бәйтерек» шаруа қожалықтарының ет павильондары мен «Бақша» әлеуметтік сауда нүктелерінде тұрғындар нарық бағасынан төмен бағамен ет және басқа да қажетті азық-түлік түрлерін сатып алу мүмкіндігіне ие.
Мұндай шаралар әсіресе көпбалалы отбасыларға, зейнеткерлерге және әлеуметтік жағынан осал топтарға үлкен қолдау көрсетуде. Өйткені әлеуметтік маңызы бар өнімдердің қолжетімділігі халықтың күнделікті шығындарын азайтып, отбасылық бюджетті үнемдеуге мүмкіндік береді.
Баға тұрақтылығын қамтамасыз етудің тағы бір тиімді тетігі – тұрақты түрде ұйымдастырылатын ауыл шаруашылығы жәрмеңкелері. Шымкент қаласында апта сайын өткізілетін азық-түлік жәрмеңкелері тұрғындар арасында үлкен сұранысқа ие. Бұл жәрмеңкелерде жергілікті өндірушілер мен шаруа қожалықтары өз өнімдерін делдалсыз тікелей тұтынушыларға ұсынады. Нәтижесінде өнім бағасы нарықтағыдан айтарлықтай төмен болады.
Қала тұрғындары үшін қолайлы болу мақсатында жәрмеңкелер бірнеше ауданда ұйымдастырылады. Әр аптаның жұма күні Абай ауданындағы Шымсити шағынауданында орналасқан №21 тұрғын үйдің алдында ауыл шаруашылығы өнімдерінің жәрмеңкесі өтеді.
Сенбі күндері бірден бірнеше орында сауда ұйымдастырылады. Атап айтқанда, Қаратау ауданындағы Тұран-2 шағынауданында №43 үйдің қарсы бетінде, Тұран ауданындағы Қажымұқан атындағы орталық стадион аумағында және Зерделі көшесі бойындағы «1000 ұсақ-түйек» дүкенінің алдында тұрғындар қажетті азық-түлік өнімдерін тиімді бағамен сатып ала алады.
Ал жексенбі күндері Қаратау ауданындағы Астана шағынауданында орналасқан №74 және №77 тұрғын үйлердің жанындағы автотұрақ аумағында жәрмеңке ұйымдастырылып келеді.
Мұндай жәрмеңкелерде ет, сүт өнімдері, көкөніс, жеміс-жидек, ұн, макарон өнімдері, күнбағыс майы, жұмыртқа және басқа да әлеуметтік маңызы бар азық-түлік түрлері ұсынылады. Өнімдердің сапасы мен бағасы тұрақты бақылауда ұсталады.
Сарапшылардың пікірінше, әлеуметтік маңызы бар азық-түлік бағасын тұрақтандыру шаралары инфляциялық қысымды төмендетуге және халықтың сатып алу қабілетін сақтауға ықпал етеді. Сонымен қатар бұл бастамалар жергілікті өндірушілерді қолдап, ауыл шаруашылығы өнімдерін өткізудің тиімді алаңына айналып отыр.
Шымкент қаласының әкімдігі алдағы уақытта да азық-түлік қауіпсіздігін қамтамасыз ету, баға тұрақтылығын сақтау және тұрғындарды сапалы өнімдермен қолжетімді бағамен қамтамасыз ету бағытындағы жұмыстарды жүйелі түрде жалғастыра бермек. Бұл шаралар қала халқының әлеуметтік жағдайын жақсартуға және тұрғындардың өмір сүру сапасын арттыруға бағытталған маңызды қадамдардың бірі болып табылады.
