Шымкент қаласының туған күніне орай ұйымдастырылған ауқымды гала-концерт қала тұрғындары мен қонақтарын бір алаңға жинап, ерекше мерекелік атмосфера қалыптастырды. Бұл кеш мегаполистің басты мәдени оқиғаларының біріне айналып, мыңдаған көрерменге көтеріңкі көңіл-күй сыйлады.
Мерекелік іс-шарада жергілікті өнерпаздармен қатар отандық эстраданың танымал жұлдыздары сахна төріне шығып, көрермендерге жарқын өнер көрсетті. Концерт барысында Зируза, Еділжан, Заттыбек Көпбосынұлы, Досымжан Таңатаров, Әбдіжаппар Әлқожа, Төреғали Төрәлі, Нұрболат Абдуллин, Ильхан, Райм және «КешYOU» тобының орындауындағы танымал әндер шырқалып, халықтың ыстық ықыласына бөленді.
Көрермендер сүйікті әншілермен бірге ән шырқап, мерекелік кештің белсенді қатысушыларына айналды. Сахна мен алаңдағы ерекше байланыс, халықтың көтеріңкі көңіл-күйі мен әртістердің әсерлі өнері гала-концерттің шынайы мерекелік рухын айқындады.
Кештің шырайын келтірген тележүргізушілер Еркебұлан Мырзабек пен Марат Оралғазин болды. Олар көрермендермен еркін форматта сұхбат құрып, залдағы көңілді атмосфераны одан әрі жандандыра түсті. Ойын-сауық пен әзілге толы жүргізу стилі мерекелік бағдарламаның әсерін күшейтті.
Гала-концерттің ең әсерлі сәттерінің бірі – кеш соңында ұйымдастырылған отшашу болды. Түнгі аспанды түрлі түсті жарқылдармен көмкерген отшашу мыңдаған көрерменнің таңданысы мен қошеметіне ие болып, мерекенің шарықтау шегіне айналды. Бұл сәт қала күніне арналған бағдарламаның ең есте қаларлық көріністерінің бірі болды.
Осылайша, Шымкент қаласының туған күні тұрғындар үшін жарқын эмоцияларға, әсерлі сәттерге және ұмытылмас естеліктерге толы мерекеге айналды. Қала көшелері мен алаңдарында сезілген ортақ қуаныш пен бірлік мерекенің басты мәнін айқындады.
Айта кетейік, Шымкенттің қала күніне арналған мерекелік іс-шаралар мұнымен шектелмейді. Бүгін сағат 10:00-де Түркістан сарайында «Шырайлы, шежірелі құтты мекен…» атты республикалық ақындар айтысы өтеді. Ал кешкі сағат 19:00-де мерекелік бағдарлама отандық эстрада жұлдыздарының қатысуымен өтетін ауқымды гала-концертпен жалғасады.
Қала әкімдігі тұрғындар мен қонақтарды мерекелік іс-шараларға белсене қатысып, Шымкент қаласының туған күнін бірге атап өтуге шақырады.
