Кәсіби бағдар беру жұмысы аясында Шымкент гарнизонының әуе шабуылына қарсы қорғаныс бригадасының мерзімді қызметтегі сарбаздары Әуе күштерінің авиабазасына қонаққа барды.
Іс-шараның негізгі мақсаты – әскери қызметшілердің ой-өрісін кеңейту, әскери ұшқыш мамандығымен таныстыру, сондай-ақ оларды келісімшарт бойынша әскери қызметті жалғастыруға және әскери оқу орындарына түсуге ынталандыру болды.
Әскери бөлімге келген сәтте сарбаздардың назарын оның қалалық әуежайға жақын орналасуы бірден аударды. Азаматтық әуе кемелері ұшып-қону кезінде жолаушылар авиабаза аумағында орналасқан әскери техникаларды көріп, кейде әскери ұшақтардың ұшуын тамашалай алады.
Әскери қызметшілерге қару-жарақ құрамындағы заманауи авиациялық техника үлгілері көрсетілді: Су-30СМ жойғыш ұшақтары, Су-25 шабуылдаушы ұшақтары, сондай-ақ Ми-171Ш және Ми-35 тікұшақтары. Барлық техника тұрақты жауынгерлік дайындықта тұр.
Экскурсия барысында сарбаздар авиабаза жеке құрамы тәулік бойы жауынгерлік кезекшілікте болып, жыл мезгіліне қарамастан кез келген уақытта қойылған тапсырмаларды орындауға дайын екенін білді.
Қатысушыларды әскери ұшқыш қызметінің ерекшеліктерімен ұшқыштардың өздері таныстырды. Олар пилот мамандығы үздіксіз білім мен дағдыны жетілдіруді, жоғары жауапкершілікті және психологиялық төзімділікті талап ететінін атап өтті.
Әскери қызметшілер үшін ерекше қызығушылық тудырған нысан – 360 градус шолу мүмкіндігі бар заманауи визуализация жүйесімен жабдықталған Су-25 ұшағының кешенді тренажері болды. Бұл тренажер жер жағдайында ұшуды басқару, маневр жасау, әртүрлі ауа райы жағдайында қону, сондай-ақ төтенше жағдайларда экипаждың әрекеттерін пысықтауға мүмкіндік береді.
— Бүгін біз еліміздің Әуе күштерінің авиабазасына келіп, аспанды бағындырған «темір құстарды» өз көзімізбен көріп, авиациялық тренажерларға отырып, оны өзіміз сезіндік – ұмытылмас әсер алдық. Әр бала кішкентайынан ұшқыш болуды армандайды деп ойлаймын. Бүгін біз сол бала арманымыздың бір бөлігін орындағандай болдық. Сонымен қатар, бұл бөлімнің көптеген жетістіктерімен таныстық. Осындай танымдық экскурсияны ұйымдастырған басшылыққа үлкен алғысымызды білдіреміз, – деді әуе шабуылына қарсы қорғаныс бригадасының мерзімді қызметтегі сарбазы, қатардағы жауынгер Жомарт Рахымберді.
Мұндай іс-шаралар әскери қызметшілердің кәсіби бағдарын айқындауға ықпал етеді. Экскурсияға қатысушылардың кейбірі болашақта өз өмірін авиациямен байланыстырып, Талғат Бигелдинов атындағы Әуе қорғанысы күштерінің әскери институтына оқуға түсуге шешім қабылдауы әбден мүмкін.
Шымкент гарнизонының баспасөз қызметі
