Қоғамдағы құқықтық мәдениетті қалыптастыру – тек білім беру мекемелерінің ғана емес, кәсіподақ ұйымдарының да басты міндеттерінің бірі. Себебі ертеңгі еңбек нарығына шығатын бүгінгі жасөспірімдердің құқықтық санасы жоғары болғанда ғана әділ әрі қауіпсіз қоғам құрылады.
Осы мақсатта Валентина Терешкова атындағы №31 жалпы орта мектебінде «Заң және тәртіп» акциясы аясында жоғары сынып оқушыларымен кезекті кездесу өтті. Іс-шараны «Заң үйірмесінің» мүшесі әрі «Шымкент қаласы кәсіподақтар орталығы» аумақтық бірлестігінің төрағасы Бауыржан Алтеев жүргізді.
Спикер оқушыларға ҚР Қылмыстық кодексіндегі жауапкершілік жастары туралы маңызды мәліметтерді жеткізді:
* Жалпы қылмыстар үшін қылмыстық жауапкершілік — 16 жастан;
* Ауыр және аса ауыр қылмыстар үшін — 14 жастан басталады.
14 жастан бастап жауапқа тартылатын ауыр құқықбұзушылықтарға:
* адам өлтіру;
* денсаулыққа қасақана ауыр зиян келтіру;
* зорлау немесе зорлық-зомбылық әрекеттері;
* ұрлық, тонау, қарақшылық;
* көлікті немесе өзге мүлікті айдап әкету;
* лаңкестік әрекеттер;
* өрт қою немесе жарылыс жасау жатады.
Бауыржан Алтеев әрбір жайтты өмірден алынған нақты мысалдармен түсіндіріп,
“Бір сәттік эмоция – бүкіл болашағыңды күйретуі мүмкін” деген ойды ерекше әсермен жеткізді.
Ол құқықбұзушылықтың салдары тек жазамен шектелмейтінін атап өтті:
* Кез келген құқықтық дерек міндетті түрде арнайы органдарда тіркеледі;
* Ол мәлімет жеке іс-қағазда өмір бойына сақталады;
* Бұл болашақта оқу, жұмысқа орналасу, шетелге шығу сияқты мүмкіндіктерді шектеп тастауы мүмкін.
Кездесу еркін пікір алмасу форматында өтті — оқушылар көкейлеріндегі сұрақтарын қойып, күнделікті өмірде кездесетін даулы жағдайларға қатысты нақты түсініктеме алды.
Кәсіподақтар тек еңбек құқықтарын қорғап қана қоймай, жастардың құқықтық мәдениетін қалыптастыруға да белсенді үлес қосуда.
Бұл жұмыс мұнымен тоқтамайды — «Заң үйірмесі» құқықтық ағарту бағытын одан әрі кеңейтіп, жүйелі түрде жалғастыруды жоспарлап отыр.
Заңды білген жас — ертеңгі күні өз құқығын қорғай алатын саналы азамат.
