Шымкент тарихында алғаш рет 1 млн шаршы метрден астам тұрғын үй құрылысы жүргізілген. Бұл туралы Шымкент қаласының әкімі Мұрат Әйтенов 2020 жылдың қорытындысы бойынша онлайн форматта халық алдында есеп беру кездесуінде мәлімдеді.
Қазіргі таңда қалада 40 мыңнан астам адам үй кезегінде тұр. Шаһар басшысының айтуынша, былтыр «Нұрлы жер» мемлекеттік бағдарламасы аясында 262 көпқабатты тұрғын үйдің құрылысы жүргізілді.
– Оның ішінде 649,1 мың шаршы метр тұрғын үй құрылысы аяқталып, 5 787 отбасы баспаналы болу мүмкіндігіне ие болды. Өткен жылы салынған үйлер бойынша қала тарихында рекордты көрсеткішке қол жеткіздік. 2019 жылмен салыстырғанда 24 пайызға артқан, — деді қала әкімі.
Әкімнің мәлімдеуінше, бүгінде қаладағы салынып жатқан үйлердің 85 пайызы — мемлекеттік үйлер.
— Мемлекеттік үйлер бюджеттің мүмкіндігіне тәуелді. Коммерциялық үйлер салатын компанияларды қолдамасақ, Шымкентте баспана мәселесін ешқашан шеше алмаймыз, — деді шаһар басшысы.
Айта кетейік, биыл 661 мың шаршы метр тұрғын үй салынып, 5 754 пәтер халықтың игілігіне беріледі.
Шымкент қаласының Ақпараттық-коммуникациялық орталығы
