Шымкент қаласында жастарды есірткі және басқа да зиянды әдеттерден сақтау бағытында бірқатар жүйелі әрі нақты шаралар қабылдануда. Бұл жұмыстардың негізгі мақсаты — жастардың құқықтық сауаттылығын арттыру, нашақорлықтың алдын алу және салауатты өмір салтын кеңінен насихаттау. Осы орайда, Шымкент қалалық Полиция департаментінің Есірткі қылмысына қарсы іс-қимыл басқармасы тұрақты түрде оқу орындарында ақпараттық-насихаттық кездесулер ұйымдастыруда.
Нашақорлықтың алдын алу – ортақ міндет
Кезекті осындай іс-шара Түркістан жоғары көпсалалы аграрлық колледжінде өтті. Кездесуге полиция қызметкерлері, оқытушылар мен студенттер қатысты. Шара барысында жастарға есірткі заттарының зияны мен олардан туындайтын салдарлар жайлы кеңінен түсіндірме жұмыстары жүргізілді.
Полиция қызметкерлері студенттерге есірткінің адам ағзасына тигізетін зияны туралы нақты ғылыми мәліметтер келтіріп, оның психикалық және физикалық денсаулыққа қалай әсер ететіні жөнінде егжей-тегжейлі баяндады. Әсіресе, қазіргі уақытта кең таралып жатқан жаңа психоактивті заттардың (ЖПЗ) қауіптілігіне ерекше назар аударылды.
Жеке тағдыр мен қоғамға төнетін қауіп
Кездесу барысында нақты өмірлік мысалдар арқылы есірткіге тәуелділіктің адамның жеке тағдырына, отбасылық өміріне, болашағына, қоғаммен байланысына және мансаптық мүмкіндіктеріне қалай зиян келтіретіні айтылды. Зиянды әдеттерге тәуелді адамдардың өмір сапасы күрт төмендеп, олардың білім алуы, жұмыс істеуі, қоғамдық ортаға бейімделуі қиындыққа тап болатыны атап өтілді.
Сондай-ақ, нашақорлықтың психологиялық әсерлері де қарастырылды — бұл адамның өз-өзіне деген сенімін жоғалтуына, күйзеліске түсуіне, тіпті құқықбұзушылыққа баруына жол ашатыны айтылды.
Құқықтық жауапкершілік – әрбір азамат білуі тиіс маңызды мәселе
Кездесудің аса маңызды бөлігінің бірі – есірткі айналымына қатысты құқықтық жауапкершілік туралы түсіндіру жұмысы болды. Полиция қызметкерлері студенттерге Қазақстан Республикасының Қылмыстық кодексіне сәйкес, есірткіні сақтау, тасымалдау, сату және тарату әрекеттері аса ауыр қылмыс ретінде танылатынын нақты мысалдар арқылы түсіндірді.
Атап айтқанда:
-
Есірткі құралдарын заңсыз сақтау, тасымалдау, дайындау, немесе сату – ауыр қылмыс болып саналады және бұл әрекеттер үшін бірнеше жылдан өмір бойына дейін бас бостандығынан айыру жазасы көзделген;
-
Интернет арқылы таралатын есірткі сатылымына байланысты «курьер«, «жасырушы«, «чат-әкімші» қызметін атқарған адамдар да қылмыстық жауапкершілікке тартылады;
-
Есірткімен байланысты кез келген қылмыстық әрекет жас адамның оқуға түсуіне, мемлекеттік қызметке орналасуына, тіпті шетелге шығуына кедергі келтіретіні ескертілді.
Жастар – ел болашағы
Полиция қызметкерлері жастарды барынша сергек болуға, күмән тудыратын әрекеттерден аулақ жүруге, өз ортасына сақтықпен қарауға және салауатты өмір салтын ұстануға шақырды. Олар сондай-ақ есірткіге қарсы күрес — тек құқық қорғау органдарының ғана емес, барша қоғамның ортақ міндеті екенін айтты.
Мұндай кездесулердің басты мақсаты – жас буынды есірткі мен зиянды әдеттерден қорғап, олардың бойында жауапкершілік пен құқықтық сауаттылықты қалыптастыру. Бұл бағыттағы жұмыстар алдағы уақытта да жалғасын табады.
