Бүгін Шымкент қаласының әкімі Ғабит Сыздықбеков халықаралық ареналарда ел намысын абыроймен қорғап, жеңіс тұғырынан көрінген спортшылармен арнайы кездесу өткізді. Іс-шара ерекше мақтаныш пен шабытқа толы атмосферада өтті. Жеңімпаздар алған әсерлерімен бөлісіп, ел үшін маңызды жеңістердің артында қандай еңбек пен ерік-жігер жатқанын көрсетті. Кездесудің басты мақсаты — чемпиондарға құрмет көрсету, ел атын шығарған спортшылардың жетістіктерін насихаттау және жас буынға үлгі ету.
Әлем чемпионатындағы тарихи жеңіс Әкім атап өткендей, Ливерпульде өткен бокстан әлем чемпионатында Қазақстан құрамасы бұрын-соңды болмаған тарихи нәтижеге қол жеткізді — 7 алтын, 1 күміс және 2 қола медаль. Бұл – отандық бокстың жаңа белесі ғана емес, бүкіл спорт саласындағы үлкен серпіліс. Осы чемпионатта елге үлкен қуаныш сыйлаған ағайынды Сабырхандардың жеңісі – ерекше мақтаныш. Махмұд Сабырхан әлем чемпионатының алтын медалін екінші рет жеңіп алса, Оның інісі, небәрі 19 жастағы Төрехан Сабырхан тұңғыш рет әлем чемпионы атанып, ел тарихында өз есімін алтын әріппен жазды. Қала әкімі ағайынды спортшыларға алғыс айтып, олардың табандылығы мен үздіксіз еңбегін атап өтті. «Мұндай жеңістер — тек жеке адамдардың жетістігі емес, тұтас ел үшін мақтаныш. Бұл жастарға шабыт, ел болашағына сенім ұялатады», — деді Ғабит Сыздықбеков.
Шымкент спортшылары — Азия додаларында да алда Шымкенттен шыққан басқа да спортшылар биыл Азия деңгейіндегі ірі жарыстарда топ жарды. Санжар-Әли Бегалиев — Бангкок қаласында өткен жастар арасындағы Азия чемпионатында алтын медаль иеленді. Ғалымжан Темірбаев, тоғызқұмалақтан үш дүркін әлем чемпионы, Абайдың 180 жылдығына арналған халықаралық турнирде де өзінің мықтылығын тағы бір мәрте дәлелдеді. Ал Жұмажан Қожамбеков әскери қызметшілер арасындағы қазақ күресінен әлем чемпионы атанып, ұлттық спорттың абыройын асқақтатты. Бұл жетістіктер Шымкент қаласының спорт саласында жүйелі қолдау мен бапкерлік мектептің жоғары деңгейін көрсетеді. Жеңімпаздарға құрмет — қоғамның мойындауы Кездесу барысында қала әкімі жеңімпаздарды демеушілер есебінен берілген автокөліктермен марапаттап, олардың еңбегі елеусіз қалмайтынын атап өтті. Бұл — тек материалдық қолдау ғана емес, ел үшін тер төккен спортшыларға көрсетілген құрметтің белгісі. «Ерік-жігер, тәртіп пен спортқа деген адалдық — осындай нәтижелерге жетелейді. Біздің чемпиондарымыз ел жастарына үлгі болып, Қазақстанның әлемдік спорттағы абыройын арттыруда», — деді Ғабит Сыздықбеков.
Сонымен қатар, қала басшысы спортшылардың жаттықтырушылары мен тәлімгерлеріне де алғыс білдіріп, олардың рөлі ерекше екенін атап өтті. Жиын соңында әкім спортшыларға жаңа биіктер мен жарқын жеңістер тіледі.
Шымкент – чемпиондар мекені Шымкент спортшыларының соңғы жылдардағы жетістіктері — кездейсоқтық емес, жүйелі еңбек пен қалалық қолдаудың нақты нәтижесі. Әлемдік аренада көк туымызды биікте желбіреткен жастар — қаланың да, елдің де болашағы. Мұндай кездесулер спортшылардың рухын көтеріп қана қоймай, жасөспірімдерге үлкен мотивация береді. Шымкент қаласы әкімдігі алдағы уақытта да бұқаралық спортты дамытуға, жас дарындарды қолдауға және спорт инфрақұрылымын жақсартуға басымдық беретінін жеткізді.
