Бүгінде қоғамды алаңдататын маңызды мәселелердің бірі – жасөспірімдер арасында есірткі заттарының, әсіресе синтетикалық есірткі түрлерінің таралуы. Бұл – тек құқықтық емес, әлеуметтік әрі тәрбиелік маңызы зор мәселе. Себебі зиянды әдеттердің жетегіне ерген жастар – болашақтың қауіпсіздігіне төнген тікелей қатер. Осыған орай, Шымкент қаласы полиция департаментінің қызметкерлері Қаратау ауданына қарасты №114 жалпы білім беретін мектепте жоғары сынып оқушыларымен арнайы кездесу ұйымдастырды. Мақсат – жастарды есірткіден қорғау Іс-шараның басты мақсаты — жасөспірімдерді есірткіге тәуелділіктен сақтандыру, құқық бұзушылықтың алдын алу, сондай-ақ оларды салауатты өмір салтына баулу.
Кездесуге Есірткі қылмысына қарсы іс-қимыл басқармасының аса маңызды істер жөніндегі аға жедел уәкілі, полиция майоры Бауыржан Карбеков пен Есірткі құқық бұзушылығының профилактикасы жөніндегі кеңес мүшесі Бахадыр Бекарыс қатысып, оқушылармен ашық әрі мазмұнды сұхбат жүргізді. Құқықтық түсіндіру мен тәрбие — басты назарда Кездесу барысында мамандар оқушыларға: құқық бұзушылық пен тәртіп бұзушылықтың салдары, жаман әдеттерден аулақ болу жолдары, салауатты өмір салтын ұстанудың маңыздылығы, бос уақытты тиімді пайдалану жолдары туралы кеңінен түсінік берді. Сондай-ақ, қылмыстық жауапкершілік жасы мен оның салдары жайлы нақты мысалдар келтіріліп, есірткі қолданудың тек денсаулыққа емес, өмірге, болашаққа, ата-ана үмітіне де үлкен қауіп төндіретіні айтылды. «Жасөспірімдер мектеп қабырғасынан бастап жақсы тәртіп пен білімге ден қойса ғана, болашақта елге пайдасы тиетін, саналы азамат болып қалыптасады», – деп атап өтті полиция майоры Бауыржан Карбеков.
Адам өмірі мен қауіпсіздігі – басты құндылық Кездесу соңында мамандар оқушыларға адам өмірі мен денсаулығынан, құқықтары мен бостандықтарынан қымбат ештеңе жоқ екенін ескертіп, қауіпсіз қоғам құру – әрбір азаматтың борышы екенін жеткізді. Жастарға дұрыс таңдау жасап, өмір жолын адал, әрі пайдалы бағытқа бұрудың маңызы ерекше атап өтілді. Осындай іс-шаралар тұрақты түрде өткізіледі Шымкент қаласы полиция департаментінің мәлімдеуінше, есірткіге қарсы күрес бағытындағы профилактикалық іс-шаралар алдағы уақытта да тұрақты түрде жалғасатын болады. Мұндай кездесулер оқушылардың құқықтық сауаттылығын арттырып қана қоймай, олардың қоғамдық өмірге белсенді, дені сау, зиянды әдеттерден аулақ тұлға ретінде қалыптасуына оң ықпал етеді. Синтетикалық есірткінің таралуына қарсы күрес – тек полицияның емес, бүкіл қоғамның ортақ міндеті. Ата-ана, мектеп және құқық қорғау органдары тығыз байланыста жұмыс істеген жағдайда ғана бұл дерттің алдын алуға болады.
