Шымкент қаласында Жастар ресурстық орталығының ұйымдастыруымен Тұран колледжінің студенттеріне арнап ерекше кездесу ұйымдастырылды. «Жастар арасында суицидтің алдын алу» тақырыбын қамтыған бұл жиын бүгінгі күннің ең өзекті мәселелерінің біріне арналды. Шараның негізгі мақсаты – жастарға өмірдің шынайы құндылығын ұғындыру, қиындықтарға берілмеуді үйрету, психологиялық тұрғыда қолдау көрсету және болашаққа деген сенімді көзқарас қалыптастыру.
Жастар арасындағы өз-өзіне қол жұмсау мәселесі қоғамды толғандыратын өзекті проблема болып отыр. Әсіресе жасөспірімдер мен студенттер арасында күйзеліс, стресс және әлеуметтік қысым салдарынан туындайтын осындай жағдайлардың алдын алу – баршамызға ортақ міндет. Осы мақсатта өткен кездесу әрбір қатысушы үшін ой саларлық әрі тағылымды болды.
Кездесуге PhD доктор, доцент, тәжірибелі гештальт-терапевт Салтанат Асанова арнайы шақырылып, студенттермен ашық әңгіме жүргізді. Ол өз сөзінде адам өмірінің маңыздылығына тоқталып, қиын сәтте көмек сұраудан қорықпау қажеттігін атап өтті. «Әрбір жас – елдің болашағы. Қандай қиындық болмасын, оның шешімі бар. Ең бастысы – жалғыз қалмау, көмекке жүгіну», – деді маман.
Студенттер көкейлеріндегі сұрақтарын қойып, жеке мәселелерін де жасырмай ортаға салды. Терапевт әр сауалға жан-жақты жауап беріп, тәжірибесінен мысалдар келтірді. Жастармен пікір алмасу барысында психологиялық тұрақтылықты қалай қалыптастыруға болатыны, күйзелістен шығудың жолдары мен өмірлік ұстанымдарды дұрыс құру жайында кеңестер берілді.
Шара барысында тек дәріс емес, интерактивті жаттығулар да өткізілді. Жастар шағын топтарда жұмыс істеп, өмірлік құндылықтар туралы ой бөлісті. Бұл әдіс олардың бір-біріне сенім артуына, ортақ ой табуына ықпал етті. Әңгіме соңында қатысушылар өздерінің алған әсерлерімен бөлісіп, алдағы уақытта өмірге деген көзқарастарының өзгергенін жеткізді.
Жастар ресурстық орталығының өкілдері мұндай кездесулердің жүйелі түрде өткізілетінін атап өтті. «Біздің басты мақсатымыз – жастардың жан дүниесіне үңілу, оларға көмек беру. Әр жас – еліміздің асыл қазынасы. Сол себепті біз оларды қолдауға, тыңдауға әрдайым дайынбыз», – дейді ұйымдастырушылар.
Тұран колледжінің студенттері үшін өткен бұл кездесу жай ғана әңгіме емес, өмірдің мәнін сезінуге жол ашқан тағылымды сабақ болды. Көптеген жастар өздерінің өмірге деген құлшынысын арттырып, болашаққа сеніммен қараудың қаншалықты маңызды екенін түсінді.
