Шымкент қаласында әлеуметтік тұрғыдан осал санаттағы азаматтарды қолдау және кәсіпкерлікті дамыту мақсатында 2025 жылдың алғашқы екі лек бойынша 333 азаматқа 400 айлық есептік көрсеткішке дейінгі (1,57 млн теңге шамасында) қайтарымсыз мемлекеттік грант берілді. Бұл бастама тұрғындардың өз ісін ашуына, табысын арттыруға және жұмыссыздықты азайтуға бағытталған маңызды әлеуметтік-экономикалық қолдау құралына айналып отыр.
Грант алуға 1700-ден астам өтініш түсті
Жалпы екі лек бойынша өткізілген конкурсқа 1756 өтініш қабылданған. Оның ішінде 336 үміткердің жобасы мақұлданып, 333 азаматқа нақты қаржы аударылды. Екі қатысушының банк шоттары бұғатталғандықтан, оларға тиесілі қаржы кері қайтарылып, гранттан бас тартуға тура келді.
Грант беру жөніндегі комиссия отырыстары 25 тамыз бен 4 қыркүйек аралығында өткізілді. Үміткерлердің бизнес-жобаларының өміршеңдігі, нарықтағы қажеттілігі және әлеуметтік тиімділігі ескерілді.
Грант иегерлерінің әлеуметтік құрылымы
Мемлекеттік грант иегерлері негізінен әлеуметтік осал топтардан құралған. Олардың ішінде:
-
192 адам – көпбалалы отбасылардың мүшелері;
-
51 адам – мүгедектігі бар азаматтар;
-
59 адам – мүгедектігі бар баланы тәрбиелеп отырғандар;
-
22 адам – асыраушысынан айырылғандар;
-
9 адам – атаулы әлеуметтік көмек алушылар.
Бұл көрсеткіштер мемлекеттік қолдаудың нақты көмекке мұқтаж жандарға бағытталғанын айқын дәлелдейді.
Кәсіпкерлік салалары бойынша бағыттар
Грант иегерлері кәсіпкерлік бастамаларын еліміз үшін өзекті және экономикалық әлеуеті жоғары салаларда іске асыруда:
-
151 жоба – қызмет көрсету саласында (шаштараз, автомойка, сұлулық салондары т.б.);
-
53 жоба – өндірістік бағытта;
-
37 жоба – кондитерлік және нан өнімдерін пісіру;
-
35 жоба – тігін цехтары;
-
24 жоба – жартылай дайын өнімдер өндірісі;
-
12 жоба – мал және құс шаруашылығы;
-
4 жоба – жиһаз өндірісі;
-
17 жоба – фаст-фуд, кофе, ыстық тағам бағытында.
Бұл кәсіп түрлері нарықта жоғары сұранысқа ие, әрі отбасылық табыс көзін тұрақты етуге қолайлы салалар болып табылады.
Қаржыны бақылау және мақсатты жұмсау – басты талап
Мемлекеттік грант қайтарымсыз болғанымен, ол нақты мақсатқа жұмсалуы тиіс. Осы талаптың орындалуын қадағалау мақсатында Еңбек мобильділігі орталығының жанынан арнайы мониторинг тобы құрылған. Олар грант иегерлерінің бизнесін кезең-кезеңімен тексеріп, қаржының дұрыс бағытта пайдаланылуын бақылайды.
Егер қаржы мақсатсыз жұмсалса немесе кәсіпкер жобадан бас тартса – мемлекеттік қаражат кері қайтарылуы тиіс.
Бұл мемлекеттік қолдау шарасы – өз кәсібін бастауға ынталы, бірақ қаржылық мүмкіндігі шектеулі азаматтар үшін үлкен мүмкіндік. Сонымен қатар:
-
жаңа жұмыс орындарының ашылуына,
-
шағын және орта бизнесті дамытуды жандандыруға,
-
жергілікті экономиканың белсенділігіне
-
және әлеуметтік тұрақтылыққа тікелей әсер ететін құрал.
Шымкент қаласы әлеуметтік қолдауға мұқтаж азаматтарды еңбекке, кәсіпкерлікке тарту арқылы олардың өмір сүру сапасын жақсартуды көздеп отыр. Мемлекеттік гранттар арқылы жүздеген тұрғын өзінің армандаған кәсібін бастап, ел экономикасына үлес қосуға жол ашты.
Кәсіп ашу арқылы табыс тауып, өзіне де, өзгеге де жұмыс ұсына білген әр азамат – мемлекеттің әлеуметтік саясатының тиімділігін дәлелдейтін жарқын мысал.
